နေပြည်တော်၊ မတ် ၂၆
    ရွေးကောက်ပွဲကော်မရှင်အဖွဲ့ခွဲ အဆင့်ဆင့်ရှိ ဝန်ထမ်းများအား မြန်မာအီလက်ထရောနစ် မဲပေးစက်အသုံးပြုခြင်းဆိုင်ရာ နည်းပြဆရာဖြစ်သင်တန်းများ ဖွင့်လှစ်ပို့ချလျက်ရှိရာ ၂၀၂၅ ခုနှစ်အတွက် ပထမဆုံး အကြိမ်သင်တန်းအမှတ်စဉ် (၁/၂၀၂၅)ကို မတ်လ ၂၃ ရက်မှ စတင်ကာ မတ် ၂၆ရက် အထိ ဖွင့်လှစ်ခဲ့ကြောင်း ပြည်ထောင်စုရွေးကောက်ပွဲကော်မရှင်၏  သတင်းထုတ်ပြန်ချက်အရ သိရသည်။ 
    ပါတီစုံဒီမိုကရေစီအထွေထွေရွေး ကောက်ပွဲတွင် မြန်မာအီလက်ထရောနစ်မဲပေးစက် (MEVM) ဖြင့် ဆန္ဒမဲပေးနိုင်ရေး  စီစဉ်ဆောင်ရွက်လျက်ရှိရာ သင်တန်းတွင် မြန်မာအီလက်ထရောနစ်မဲပေးစက် (MEVM) တည်ဆောက်ပုံနည်းလမ်းများ၊ စက်တပ်ဆင်ပုံ၊ စမ်းသပ်မဲပေးပုံ၊ ဖြန့်ခွဲပုံ၊ ရွေးကောက်ပွဲနေ့တွင် မဲရုံ၌ မဲပေးစက်တပ်ဆင်ခင်းကျင်းပုံ၊ မဲရလဒ်ရေတွက်ပုံ၊ နည်းဥပဒေပါအတိုင်း မဲရလဒ်စာရင်းပြုစုပုံ၊ မဲပေးစက်အား ပြန်လည်ထုပ်ပိုး သိမ်းဆည်းပုံတို့ကို လုပ်ငန်း ညွှန်ကြားချက်များနှင့်အညီ သင်ကြားပြသပေးခြင်းဖြစ်ကြောင်း ရွေးကောက်ပွဲကော်မရှင်က ထုတ်ပြန်ထားသည်။ 

    ရွေးကောက်ပွဲ၌ မဲပေးစက်ကိုင် တွယ်ကြီးကြပ်မည့်သူများအား ဆင့်ပွားသင်တန်းများ ပို့ချပေးနိုင်ရန်အတွက် ရွေးကောက်ပွဲ ကော်မရှင်အဖွဲ့ခွဲ အဆင့်ဆင့်ရှိ ဝန်ထမ်းများကို မဲပေးစက် အသုံးပြုခြင်းဆိုင်ရာ ဆရာဖြစ်သင်တန်းများ ဖွင့်လှစ်ပို့ချ ပေးခဲ့ရာ ၂၀၂၄ ခုနှစ်အတွင်း သင်တန်းအ မှတ်စဉ်ကိုးခု ဖွင့်လှစ်ခဲ့ပြီး တိုင်းဒေသကြီးနှင့် ပြည်နယ်အသီးသီးမှ အရာထမ်း၊ အမှုထမ်း စုစုပေါင်း ၂၂၇ ဦးကို သင်တန်းပို့ချခဲ့ပြီး ဖြစ်ကြောင်း၊ ယခုသင်တန်းသည် ၂၀၂၅ ခုနှစ်အတွက် ပထမဆုံးအကြိမ် သင်တန်းဖြစ်ပြီး ဆရာဖြစ်သင်တန်း ဖြစ်သည့်အတွက် သင်တန်းသားများအနေဖြင့် ကျွမ်းကျင်မှုရှိရန်၊ လေးလေးနက်နက် သင်ယူကြရန် လိုအပ်ကြောင်း ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးကိုကိုက မတ်လ ၂၃ ရက်က နေပြည်တော်ရှိ ပြည်ထောင်စုရွေးကောက်ပွဲကော်မရှင်ရုံး တိုးချဲ့ရုံး အဆောက်အအုံ၌ ပြုလုပ်သည့် သင်တန်းအမှတ်စဉ် (၁/၂၀၂၅) သင်တန်းဖွင့်ပွဲ အခမ်းအနားတွင် ပြောကြားခဲ့သည်။
    ၂၀၂၀ ပြည့်နှစ် အထွေထွေရွေး ကောက်ပွဲ၌ ဖြစ်ပွားခဲ့သည့် မဲစာရင်းမှားယွင်းမှု၊ မဲစာရင်း ဖောင်းပွမှုများနှင့် မဲမသမာမှုဖြစ်စဉ်များကို သုံးသပ်၍ မဲမသမာမှုဖြစ်နိုင်သည့် မဲလက်မှတ်ဖြင့် မဲပေးခြင်းစနစ်အစား အီလက်ထရောနစ်မဲပေးစက်ဖြင့် မဲပေးနိုင်ရေးကို ပြည်ထောင်စုရွေးကောက်ပွဲကော်မရှင်က ဆောင်ရွက်ခဲ့သည်။ မဲပေးစက်နှင့်စပ်လျဉ်း၍ ပြည်ထောင်စု နယ်မြေအပါအဝင် တိုင်းဒေသကြီးနှင့် ပြည်နယ်ငါးခုနှင့် ပြည်ထောင်စုအဆင့်အဖွဲ့အစည်းများ၊ ဝန်ကြီးဌာ နများအပါအဝင် အဖွဲ့အ စည်း ၄၇ ဖွဲ့တို့ရှိ မဲဆန္ဒရှင် ပြည်သူများ၊ နိုင်ငံရေးပါတီ ၃၅ ပါတီမှ ကိုယ်စားလှယ်များကို ရှင်းလင်းပြသခြင်းနှင့် လက်တွေ့စမ်းသပ်မဲပေးစေခြင်းများ ဆောင်ရွက်ခဲ့ပြီးဖြစ်ကြောင်း ပြည်ထောင်စု ရွေးကောက်ပွဲ ကော်မရှင်၏ ထုတ်ပြန်ချက်အရ သိရသည်။
    ထို့အပြင် MEVM စက်များအသုံး ပြု၍ မဲဆန္ဒရှင်ပြည်သူများ၏ လက်တွေ့စမ်းသပ် မဲပေးဆောင်ရွက်ခြင်းမှတစ်ဆင့် ရရှိလာသည့် အကြံပြုချက်များအပေါ် ပြင်ဆင်ဆောင်ရွက်ခဲ့ပြီး စနစ်ပိုင်း ဆိုင်ရာသာမက လုံခြုံစိတ်ချရမှုအပိုင်း၊ မဲဆန္ဒရှင်များ၏ ယုံကြည်မှုအပိုင်း၊ ကြံ့ခိုင်မှုနှင့် အရည်အသွေးကောင်းမွန်မှု အပိုင်းများတွင်ပါ ပိုမိုကောင်းမွန်အောင် ဆောင်ရွက်နိုင်ခဲ့ပြီး ဖြစ်ကြောင်း၊ ကျင်းပမည့် ရွေးကောက်ပွဲတွင် မဲလက်မှတ်ဖြင့် မဲပေးခြင်းအစား မြန်မာအီလက်ထရော နစ်မဲပေးစက်ဖြင့် မဲပေးခြင်းသည် မြန်မာနိုင်ငံအတွက် ပထမဆုံးအကြိမ် ဆောင်ရွက်ခြင်း ဖြစ်ရာ မဲဆန္ဒရှင်ပြည်သူများ လွယ်ကူစွာမဲ ပေးနိုင်ရေးနှင့် မဲပေးစက်ကိုင်တွယ်မည့်သူများ စနစ်တကျကိုင်တွယ်နိုင်ရေးသည် အဓိကကျသည့် အပိုင်းဖြစ်ကြောင်း၊ ကော်မရှင်အနေဖြင့် ရွေးကောက်ပွဲကော်မရှင်အဖွဲ့ခွဲ အဆင့်ဆင့်ရှိ ဝန်ထမ်းများကို မြန်မာအီလက် ထရောနစ်မဲပေးစက် ကိုင်တွယ်အသုံးပြုခြင်း သင်တန်းများပို့ချခဲ့သကဲ့သို့ မဲဆန္ဒရှင်ပြည်သူများကိုလည်း ရှင်းလင်းပြသခြင်းနှင့် လက်တွေ့မဲပေးစေခြင်းများ ဆောင် ရွက်ခဲ့ကြောင်း ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးကိုကိုက ပြောကြားခဲ့သည်။ ညီသစ်