၂၀၂၃ ဒီဇင်ဘာ ၄

(ယခင်အပတ်မှအဆက်)

          ကိုးကန့်ဘိန်းဘုရင်မ 'အောလစ်ဖ်ယန်း' အကြောင်းကို ၂၀၂၃ ခု ဒီနှစ်ထဲမှာပဲ RFA က ထုတ်လွှင့် သွားခဲ့ပါတယ်။ မစမ်းစမ်းတင်အသံနဲ့ ဖတ်ကြားထုတ်လွှင့် သွားခဲ့တာ နားထောင်ခဲ့ရပါတယ်။ အဲဒီ ထုတ်လွှင့်ချက်ထဲမှာ အောလစ်ဖ်ယန်းဟာ နာမည်ကြီး ထပ်ဆင့်အကယ်ဒမီ မင်းသမီး ...နဲ့ လိင်တူ ဆက်ဆံပေါင်းသင်းခဲ့ကြောင်း ကြားလိုက်ရတော့ အတော်အံ့သြသွားပါတယ်။ အကယ်ဒမီများရှင် အဲဒီမင်းသမီးက ယခု အသက် (၈၀) ကျော်ရှိလာသည့်တိုင် ဒီနေ့ခေတ်စားနေတဲ့ ရုပ်သံဇာတ်လမ်းတွဲ တစ်ခုမှာ ပါဝင်သရုပ်ဆောင်လျက်ရှိတာ ဖျတ်ခနဲ တွေ့လိုက်ရပါတယ်။ RFA ကတော့ မင်းသမီးကြီးရဲ့ နာမည်ကို ဖော်ထုတ်ကြေညာ အသံလွှင့်သွားခဲ့တာပါ။ မီဒီယာကျင့်ဝတ်ကို မစောင့်ထိန်းဘဲ မင်းသမီး နာမည် အတိအကျနဲ့ အသံလွှင့်သွားတာလည်း အံ့သြခဲ့ရပါတယ်။

          ၂၀၂၃ ဇူလိုင်ထုတ် ဆရာနိုင်ဦး ဘာသာပြန်တဲ့ 'ကိုးကန့်မင်းမီး အောလစ်ဖ်ယန်း'စာအုပ်မှာလည်း အောလစ်ဖ်ယန်းနဲ့ မင်းသမီးတို့ရဲ့ ဆက်နွှယ်ပတ်သက်ပုံ အခန်းကဏ္ဍတွေကို ဖတ်ခဲ့ရပါတယ်။ မူရင်းစာအုပ်မှာ ရုပ်ရှင်မင်းသမီးရဲ့နာမည်ကို ဖော်ပြကောင်း ဖော်ပြထားနိုင်ပါတယ်။ ဒါပေမဲ့ ဆရာနိုင်ဦး ကတော့ ရုပ်ရှင်မင်းသမီးရဲ့ဂုဏ်သိက္ခာကို စောင့်စည်းပြီး နာမည်မဖော်ပြဘဲ 'ရွှေမင်းသမီး'လို့ပဲ ရေးခဲ့ပါတယ်။ မူရင်းစာအုပ် The Opium Queen  ထဲက မသင့်တော်တဲ့ အခန်းတွေချန်လှပ်ပြီး ဘာသာပြန်ခဲ့ တယ်လို့လည်း ဆရာနိုင်ဦးက ဆိုပါတယ်။ အောလစ်ဖ်ယန်းဟာ အသက် (၉၀)အထိ နေထိုင်သွားတာ ဆိုတော့ သူမဘဝအကြောင်း တကယ်ရေးမယ်ဆိုရင် အလွန်ထူထဲတဲ့ စာအုပ်ကြီး ဖြစ်သွားနိုင်ပါတယ်။ မူရင်းရေးသူ အမေရိကန်နိုင်ငံသူ ဂျာနယ်လစ် 'ဂတ်ဘီ'မှာလည်း အချက်အလက် ပြည့်စုံအောင် စု ဆောင်းဖို့ အခက်အခဲရှိနိုင်ပါတယ်။ ရေးတဲ့ပုံစံကလည်း အတ္ထုပ္ပတ္တိဟန်မဟုတ်၊ ဟိုတစ်ကွက်သည်တစ်ကွက် မှန်ကူကွက် ဆန်ဆန်ဖြစ်နေတာမို့ အတော်ဆက်စပ်ယူရ တယ်။

          ဥပမာ အောလစ်ဖ်ယန်းနဲ့ ရုပ်ရှင်မင်းသမီးတု့ိ ရဲ့ ဇာတ်ဝင်ခန်းတွေကို တစ်ဆက်တည်း ရေးသွားတာ မဟုတ်ဘဲ ပေါ်လာလိုက် ပျောက်သွားလိုက်၊ နောက်တစ် ခါ ပြန်ပေါ်လာလိုက်နဲ့ ဖျတ်ခနဲ၊ ဖျတ်ခနဲ ရေးပြသွား တယ်။ စာမျက်နှာ ၁၁၆ မှာ အစပျိုးလိုက်တာ စာမျက် နှာ ၁၈၅ မှာ တစ်ခါပြန်ပေါ်လာတယ်။ နောက်ပျောက် သွားပြီး စာမျက်နှာ ၂၁၆၊ စာမျက်နှာ ၂၄၂ တို့မှာ မင်း သမီးနဲ့ ဆက်စပ်ပတ်သက်ခဲ့ပုံတွေ ဟိုတစ်ကွက် သည် တစ်ကွက် ရေးသွားတာပါ။ ဂတ်ဘီက သတင်းသမားပီပီ ဇွဲကောင်းကောင်းနဲ့ အကွက်ချောင်းပြီး သတင်းနှိုက်ယူ လေ့ရှိပါတယ်။ အောလစ်ဖ်ယန်းရဲ့ ဆွေမျိုးသားချင်း အဆက်အနွယ်တွေဆီ လက်လှမ်းမီသမျှ သွားရောက် တွေ့ဆုံ မေးမြန်းခဲ့လေရာ 'ဂျူဒီ' ပြောပြတဲ့အထဲမှာ ရုပ်ရှင်မင်းသမီးနဲ့ ဇာတ်လမ်းကို သဲလွန်စရခဲ့ပါတယ်။

          ဂျူဒီဟာ အောလစ်ဖ်ယန်းရဲ့ အငယ်ဆုံးညီမ ဖြစ်ပြီး ရန်ကုန် စမ်းချောင်းမှာ တိုက်ခန်းတစ်ခုရဲ့ မြေ ညီထပ်မှာ မထင်မရှား နေထိုင်လျက်ရှိတယ်။ ဂတ်ဘီ တွေ့ဆုံမေးမြန်းချိန်မှာ အသက် (၇၆) နှစ်ရှိနေပြီ။

          'အောလစ်ဖ်ယန်းဟာ လိင်တူချင်း ဆက်ဆံလိုသူ၊ သူကြိုက်နေတဲ့ အမျိုးသမီးတွေအတွက် ပိုးကြေးပန်းကြေးအဖြစ် မိသားစုပိုင် အဖိုးတန်ဥစ္စာပစ္စည်းတွေ ကို ဖြုန်းတီးခြင်းဖြင့် ကိုးကန့်စော်ဘွားမိသားစု ဂုဏ် သိက္ခာကို ညှိုးနွမ်းအောင်လုပ်ခဲ့သည်ဆိုသော ယုံကြည်မှုသည် ဂျူဒီ့ဒေါသ၏ ဗဟိုချက်ဖြစ်နေသည်' (စာ-၁၁၅)

          'သူကြိုက်တဲ့ ကောင်မတွေအတွက် အိမ်ဝယ် ပေးတာနဲ့ပဲ ကုန်ပါရောလား။ ထောင်ထဲရောက်သွား ပြန်တော့လည်း သွားတွေ့ရ အမျိုးမျိုးဒုက္ခတွေ ပေးခဲ့တယ်။ အဲဒီ အထဲမှာ ရွှေမင်းသမီးလည်းပါသပေါ့'

          'ရှင် ဆိုလိုတာက မင်းသမီးကြောင့် အောလစ်ဖ်ယန်း ထောင်ထဲရောက်သွားတယ်လို့ ဆိုလိုတာလား'

          'ဟုတ်တယ်။ အောလစ်ဖ်ယန်းကို ထောင်ထဲ ထည့်ပြီး အောလစ်ဖ်ယန်းအိမ်ကို အပိုင်စီးသွားတာပဲ'

          အိမ်ကြီးတစ်လုံး ဘယ်လိုရခဲ့သလဲဆိုတာ မင်းသမီးကို တွေ့ဆုံမေးမြန်းသင့်ကြောင်း ဂျူဒီက အကြံပေးပါတယ်။ တစ်နေ့မှာတော့ ရွှေမင်းသမီးနဲ့ အောလစ်ဖ် ယန်းတို့ အတူနေခဲ့တဲ့ အိမ်ကြီးဆီရောက်သွားပါတယ်။ ခြံဝင်းကလည်း အကျယ်ကြီး၊ အိမ်နောက်ဘက် မြေကွက်ကျယ်ကြီးမှာ ဟိုတယ်တစ်လုံးရှိပြီး အဲဒီမြေကွက်ကိုတော့ 'ဝ'တွေက ဝယ်ယူသွားတယ်လို့ ဆိုပါတယ်။ မင်းသမီးက ၁၉၆၂ မှာ ဆေးပညာ သင်ယူနေစဉ် ရုပ်ရှင်လောကသို့ ရောက်ခဲ့ကြောင်း၊ တစ်ကားတည်းနဲ့ ပေါက်ခဲ့ပြီး နောက်ပိုင်းမှာ အကယ်ဒမီဆုတွေလည်း ရခဲ့ကြောင်း၊ ရုပ်ရှင်သရုပ်ဆောင်လည်းလုပ်၊ ဒါရိုက်တာလည်းလုပ်သူ အမျိုးသားနှင့် အိမ်ထောင်ကျခဲ့ကြောင်းတွေ စီကာပတ်ကုံး ပြောပြပါတယ်။ ဂျာနယ်လစ်က အောလစ်ဖ်အကြောင်း မေးတဲ့အခါ အတော်စိတ်ဆိုးသွားပါတယ်။

          'ယခင်က ဟောဒီအိမ်ကြီးဟာ အောလစ်ဖ် အိမ်လို့ ကျွန်မ သိထားပါတယ်'

          ရွှေမင်းသမီးက ဘူးကွယ်ရင်း မောင်းထုတ်တဲ့ အမူအရာ လုပ်ပြပါတယ်။ (စာ-၁၈၇)'

          'အင်းစိန်ထောင်မှ အောလစ်ဖ်လွတ်မြောက်လာသည့်အခါ အောလစ်ဖ်ကို မင်းသမီးကအတွေ့မခံ၊ အကြောင်းအမျိုးမျိုးပြ၍ ရှောင်နေသည်။ အောလစ်ဖ် အကျဉ်းကျနေစဉ် အမျိုးသားတစ်ယောက်နှင့် မင်းသမီး တွဲနေသည့် သတင်းကြားကြားချင်း အောလစ်ဖ် မယုံ ကြည်၊ သူ့ကို မင်းသမီး တကယ်ချစ်တာပဲလို့ ထင်နေ သေးသည်။ မကြာမီ မင်းသမီး လက်ထပ်သည့် သတင်း ကြားရသည့်အခါ ရှေ့နေတစ်ယောက်ငှားကာ အိမ်ကို ပြန်ရဖို့ မင်းသမီးကို တရားစွဲတော့သည်။ အစောပိုင်း တွင် အောလစ်ဖ်ဘက်မှ အနိုင်ရဖို့ အလေးသာနေသည်။ ဂျာနယ်၊ မဂ္ဂဇင်းများတွင်လည်း အောလစ်ဖ်နှင့် မင်း သမီးတို့၏ တိတ်တိတ်ပုန်း အရှုပ်ထုပ်တွေအကြောင်း အုန်းအုန်းကျွက်ကျွက် ရေးသားဖော်ပြခဲ့ကြသည်။' (စာ-၁၈၉)

          ထောင်ကျခဲ့စဉ်က ထောင်မှူးမနဲ့ ချစ်ကြိုက်ခဲ့ပြီး လွတ်လာတော့ ပေါင်းသင်းနေထိုင်ခဲ့ကြသေးတယ်။ အဲဒီထောင်မှူးမကလည်း အိမ်ကြီးတစ်လုံး ညာယူသွား တယ်လို့ဆိုတယ်။ အောလစ်ဖ်ဟာ ဘိန်းကရတဲ့ ငွေတွေနဲ့ ထင်ရာစိုင်းခဲ့သူ ဖြစ်ပါတယ်။ အောလစ်ဖ်ဟာ ယော က်ျားလျာတစ်ယောက်မို့ မိန်းမကိစ္စ ပွေရှုပ်ခဲ့ပေမယ့် မိဘတွေ အတင်းအကျပ်စီစဉ်လို့ အိမ်ထောင်ကျခဲ့ဖူးပါ တယ်။ ကိုးကန့်နယ်အတွင်းက မျိုးနွယ်စုအကြီးအကဲရဲ့ သားဖြစ်သူ 'ဒူဝမ်ချောင်မန်းနဲ့ ငယ်စဉ်က လက်ထပ်ခဲ့ဖူးပါတယ်။ သူတို့ လက်ထပ်တဲ့နေရာ ၁၉၄၈ ဇန်နဝါရီ ၄ ရက် မြန်မာပြည် လွတ်လပ်ရေးရတဲ့နေ့နဲ့ ထူးထူးခြားခြား တိုက်ဆိုင်နေပါတယ်။ အောလစ်ဖ်ယန်းရဲ့ တောင်း ဆိုမှုအရ သူ့အမေက မင်္ဂလာလက်ဖွဲ့အဖြစ် ပစ္စတိုနှစ် လက်ပေးခဲ့ရပါတယ်။ သို့သော် သူတို့ အိမ်ထောင်ရေးက အဆင်မပြေပါဘူး။ ဒူဝမ်ချောင်မန်းဟာ အောလစ်ဖ် ယန်းအနား ကပ်လို့တောင်မရပါဘူး။ ဒါနဲ့သူလည်း တစ်ညလုံး ဘိန်းရှူပြီး အချိန်ဖြုန်းရပါတယ်။

          'ဟော်နန်းအတွင်းသို့ ဒူဝမ်ပြန်ရောက်လာပြီး မိသားစုနှင့်အတူရှိနေစဉ် အောလစ်ဖ်ယန်း ကိုယ်ဝန်ရဖို့ ဒူဝမ်မိခင်ကိုယ်တိုင် စနစ်တကျ စီမံဆောင်ရွက်ခဲ့သည်။ ဒူဝမ်တို့ လင်မယားအိပ်ခန်းအတွင်း သေနတ်နှင့် အခြား လက်နက်အဖြစ် အသုံးပြုနိုင်သော ပစ္စည်းပစ္စယများကို အစောင့်အကြပ်တွေခေါ်ကာ ရှင်းလင်းဖယ်ရှားခဲ့သည်။ ထိုနေ့ည သူတို့လင်မယားကို အိပ်ခန်းထဲထည့်၍ တံခါး အပြင်မှ သော့ခတ်ထားသည်။ လင်မယားကိစ္စ မပြီးမ ချင်း အိပ်ခန်းအတွင်းမှာနေကြရမည်ဖြစ်ကြောင်း အမိန့် ပေးထားသည်' (စာ-၉၆)

          ဒီလိုနဲ့ ရုန်းရင်းဆန်ခတ်တွေကြားက လင် မယားကိစ္စ အောင်မြင်သွားတယ် ဆိုပါတယ်။ အလိုမတူဘဲ ဒူဝမ်ရဲ့ မယားဖြစ်သွားရတာကို အောလစ်ဖ် လက်မခံနိုင်သေး။ သူ့သဘောနှင့်သူ လင်မယားကွာရှင်းခဲ့ လျှင်လည်း ကိုးကန့်ဓလေ့ထုံးစံအရ 'အိမ်ကျွန်'အဖြစ် သတ်မှတ်ခံရလိမ့်မယ်။ အဲဒီအချိန် ကိုးကန့်မှာအပြောင်း အလဲတွေ ဖြစ်နေခဲ့ပြီ။ အောလစ်ဖ်မှာလည်း ကိုယ်ဝန်ရှိလာခဲ့ပြီ။ ကိုယ်ဝန်လွယ်ထားလျက်ကပဲ ဒူဝမ်တို့ဆီကနေ ကိုးကန့်မြေသို့ တိတ်တဆိတ်ထွက်ပြေးလာခဲ့တယ်။ 'ဖန်ဝါ'ဆိုတဲ့ ကြေးစားစစ်သား ဓားပြခေါင်းဆောင်ရဲ့ အကူ အညီနဲ့ ထွက်ပြေးခဲ့တာ ဖြစ်ပါတယ်။

          ကိုးကန့်မျိုးနွယ်စုတွေအတွင်းမှာ အာဏာလုပွဲတွေ ရှိနေတတ်ရာ ဓားပြတွေရဲ့ အကူအညီနဲ့ ဆူပူ သောင်းကျန်းလုပ်ကြံမှုတွေ ကျူးလွန်လေ့ရှိတယ်။ တစ် ကြိမ်မှာ ကိုးကန့်အရာရှိ သုံးယောက် အသတ်ခံရလေရာ ကိုးကန့်စော်ဘွား အသိုင်းအဝိုင်းက ဖန်ဝါကို ငှားပြီး လက်တုံ့ပြန်တယ်။ ဖန်ဝါက လူသတ်ခေါင်းဖြတ်ပြီး ဆု တော်ငွေ အမြောက်အမြား ထုတ်ယူလေ့ရှိတယ်။ ဖန်ဝါမှာ နောက်လိုက်အင်အားရှိပြီး တောင်ပေါ် ဘိန်းခင်းတွေ ကြားမှား ရွာတည်ပြီးနေတယ်။ ဖန်ဝါတို့ စခန်း(ရွာ)ရဲ့ နောက်မှာ ပုရွက်နီတွေနဲ့ စပါးအုံးေ>မတွေနေတဲ့ အလွန်နက်တဲ့ လိုဏ်ဂူတွင်းကြီးတစ်ခုရှိတယ်။ ဖန်ဝါတို့ အဖွဲ့တွေဟာ သူတို့ သတ်ချင်သူကို ခေါင်းဖြတ်သတ်ပြီး ခေါင်းပြတ်တွေကို အဲဒီ တွင်းကြီးထဲ ပစ်ချထားလေ့ရှိတယ်။ အဲဒီနေရာ ခေါင်းပြတ်သရဲတွေ ခြောက်လှန့် သောင်းကျန်းလွန်းလို့ အရက်နဲ့ပသမှ အဆင်ပြေတယ်လို့ ဆိုတယ်။ ဖန်ဝါဟာ ကိုးကန့်မိသားစုရဲ့ လက်စွဲလို့ ဆိုနိုင်တယ်။

          အောလစ်ဖ်ယန်း အဓမ္မလင်ပေးစားခံရပြီး မကြာခင်မှာပဲ ဖခင်စော်ဘွားကြီး ကွယ်လွန်တယ်။ ကိုး ကန့်စော်ဘွားရာထူးကို အက်ဒွပ်ယန်းက ဆက်ခံတယ်။

          'ကိုးကန့် စော်ဘွား အသုဘအခမ်းအနားကို ခုနစ်ရက်တစ်ပတ်ကြာမျှ ကျင်းပနေစဉ် အရိုင်းတောင် အနီး နယ်ခြားတစ်နေရာတွင် မျိုးနွယ်စုတစ်စု၏အတိတ် ရန်ငြိုးဟောင်းတွေ အစပြန်ပေါ်လာသည်။ ဖြစ်ပုံမှာ ဒုတိယကမ္ဘာစစ်ပြီးနောက် ခရစ်ယာန်ဘာသာဝင် 'ဝ' မျိုးနွယ်တွေကို တရုတ်ကွန်မြူနစ်တွေ အကြမ်းဖက် နှိမ်နင်းခြင်းမှ စတင်သည်။ ယေဘုယျအားဖြင့် 'ဝ' မျိုး နွယ်စုများတွင် အရိုင်း'ဝ'နှင့် အယဉ်'ဝ'ဟူ၍ နှစ်မျိုးခွဲ ထားသည်။ အယဉ်ဝများမှာ ခရစ်ယာန်ဘာသာဝင်တွေ ဖြစ်လာသော အုပ်စုဖြစ်သည်။ အရိုင်း 'ဝ'အုပ်စုမှာ ခေါင်းဖြတ်သော အလေ့ကို ဆက်လက်ကျင့်သုံး၍ နတ် ကိုးကွယ်သော အလေ့အထ ကျင့်သုံးနေသူတွေပဲ ဖြစ် သည်။' (စာ-၉၈)

          ဒီနေရာမှာ 'ဝ'တွေရဲ့ ]ခေါင်းဖြတ်ဓလေ့' ပေါ် ပေါက်လာပုံကို အမေရိကန်ဂျာနယ်လစ် ဂတ်ဘီက ဒီလို ရေးထားပါတယ်။ 'ဝ'အမျိုးသမီးတစ်ဦးကို တရုတ်တစ်ယောက်က မျိုးမအောင်သော စပါးစေ့တွေ လိမ်ညာ၍ ရောင်းချခဲ့သည်။ စပါးစေ့တွေကို မြေချစိုက်ပျိုး၍ စပါး ပင်ပေါက်မလာသောအခါ အောက်လမ်းဆရာ တစ် ယောက်ဆီသွားပြီး အကျိုးအကြောင်းပြောပြသည်။ စပါးစေ့တွေ အပင်ပေါက်စေချင်လျှင် တရုတ်ဦးခေါင်းကိုဖြတ် ၍ လည်ချောင်းသွေးနှင့် စပါးပင်တွေကို ဖျန်းပက်ပေး ဖို့ အစီရင်ပေးသည်။ 'ဝ'အမျိုးသမီးသည် အစီအရင် အတိုင်း တရုတ်တစ်ယောက်ကို ခေါင်းဖြတ်၍ လည် ချောင်းသွေးနှင့် စပါးခင်းကိုစီစဉ်ရာ စပါးပင်တွေအလျင် အမြန် ကြီးထွား၍ စပါးတွေ ရိတ်သိမ်းခဲ့ရသည်။ သို့ဖြစ် ၍ နှစ်စဉ်နှစ်တိုင်း လူတစ်ယောက်ကို ယဇ်ပူဇော်၍ သွေးဖြင့် စပါးခင်းတွေကို စီရင်သော အလေ့အထ ဖြစ် လာသည်။ ယဇ်ပူဇော်ရာတွင် လူဦးခေါင်းတွေကို ရွာ ထိပ်တွင် တံကျင်လျှိုပြသထားရာ 'ဝ'တွေဆိုလျှင် ဝေး ဝေးက ရှောင်တတ်ကြသည်။' (စာ-၄၈)

          'ဝ' လူမျိုးအများစုမှာ ကိုးကန့်ဒေသ တောင် ဘက်တောရိုင်းမြေရိုင်း ပတ်ဝန်းကျင်တွင် သစ်လုံးများ ဖြင့် အကြားအလပ်မရှိ ပိတ်ဆို့ထားသော ရွာများတွင် နေထိုင်ကြပြီး အထူးသဖြင့် တရုတ်လူမျိုးတွေကို သံသ ယရှိကြသည်} (စာ-၄၈)

          'ဝ'ဒေသတွင်း ဘော်သတ္တုတူးဖော်ခြင်းကို တရုတ်တွေကို ခွင့်ပြုခဲ့ဖူးပါတယ်။ တူးဖော်ရရှိတဲ့ သတ္တု ရဲ့ တစ်ဝက်ပေးမယ်ဆိုပြီး ]ဝ}တွေကို အဓမ္မခိုင်းစေခဲ့ကြ တယ်။ ဒါပေမဲ့ ဘော်သတ္တုကို 'ဝ'တွေ ရသင့်သလောက် မရဘဲ တရုတ်တွေပဲ အပိုင်စီးသွားတယ်။ ငွေသတ္တုတွေကို ခေါင်းတလားဖြင့်ထည့်ကာ တရုတ်ပြည်သို့ ခိုးထုတ် ကြရာ 'ဝ'တွေ သံသယရှိ၍ စစ်ဆေးသည့်အခါ တရုတ် သူခိုးတွေကိုဖမ်းဆီး၍ တစ်ယောက်မကျန် ကွပ်မျက် လိုက်ကြသည်။ ထိုအချိန်မှစ၍ ဘော်သတ္တုတွင်းကို ပိတ် သိမ်း၍ 'ဝ'နယ်အတွင်းသို့ သူစိမ်းတစ်ယောက်မှ ဝင်ခွင့် မပြုတော့' (စာ-၄၉)

          ကိုးကန့်ဒေသမှာ 'ခဲပေါ့'ဆိုတဲ့ မျိုးနွယ်စုတစ်ခု လည်းရှိသေးတယ် ဆိုပါတယ်။ သူတို့ဟာ နတ်ဖန်ဆင်းတဲ့ ဘူးသီးအစေ့များမှ မွေးဖွားလာတဲ့ ဘီလူးပေါက်ကလေး ကိုးကောင်က ဆင်းသက်လာတယ်လို့ ဖော်ပြထားပါ တယ်။ 'ဝ'လူမျိုးတို့ရဲ့ ဘိုးဘေးတွေဟာလည်း ဘူးသီး အစေ့လေးတွေက ဆင်းသက်လာတယ်လို့ ဆိုကြတယ်။ ကိုးကန့် ခုနစ်ရက်တစ်ပတ် ဈေးသို့ 'ဝ'ခေါင်းဖြတ်မုဆိုးတွေ တစ်ခါတစ်ရံ ရောက်လာတတ်ကြတယ်။ သူတို့လို အပ်တဲ့ဆားကို ဘိန်းနဲ့လဲယူဖို့ ရောက်လာခြင်း ဖြစ် တယ်လို့ ဆိုပါတယ်။

          ခေါင်းဖြတ် 'ဝ'မုဆိုးအရိုင်းတွေနဲ့ ခရစ်ယာန် ဖြစ်သွားတဲ့ 'ဝ'တွေကြား ကိုးကွယ်ယုံကြည်မှု ကွဲပြားသွား ရာက ရန်ငြိုးရန်စတွေ ဖြစ်ပေါ်ခဲ့တယ်လို့ သိရပြီး ၁၉၄၉ တရုတ်ပြည်မှာ ကွန်မြူနစ်တွေ အာဏာရလာတဲ့အခါ ယူနန်ပြည်နယ်နဲ့ ထိစပ်နေတဲ့ 'ဝ' ဒေသတွင်း တရုတ်ကွန်မြူနစ်တွေ ဝင်ရောက်လာကြတယ်။

          'ခရစ်ယာန် 'ဝ'အမျိုးအနွယ်တွေကို ကွန်မြူနစ်တွေ ဖိနှိပ်နေသည်ဟု ကြားရသည့်အခါ အရိုင်း 'ဝ'တွေ တစ်စခန်းထလာသည်။ ခရစ်ယာန်'ဝ'တွေကို လက်စား ချေဖို့ အရိုင်း 'ဝ'တွေအတွက် အခွင့်အရေးရလာသည်။ ခရစ်ယာန် 'ဝ'တွေ နေထိုင်ရာ ရွာတွေကို မီးရှို့၍ ခရစ်ယာန်တွေ သာသနာပြုတွေကိုလည်း ဒေသတွင်း မတည် ငြိမ်အောင် လှုံ့ဆော်နေသူတွေအဖြစ် စွပ်စွဲကာ ရပ်လုပ် လာကြသည်' (စာ-၉၉)

          တရုတ်ကွန်မြူနစ်တွေရဲ့ ညွှန်ကြားချက်အရ ခရစ်ယာန်ဘုရားကျောင်းကို ပိတ်လိုက်ရပြီး ခရစ်ယာန် ဓမ္မဆရာတစ်ယောက်လည်း အကျဉ်းချခံရတယ်လို့ ဆိုပါ တယ်။ ခရစ်ယာန် 'ဝ'တွေဟာ ကိုးကန့်ဒေသသို့ ထွက် ပြေးခိုလှုံကြရာ တရုတ်ကွန်မြူနစ်တွေက ကိုးကန့်ဒေသ တွင်းအထိ လိုက်လံတိုက်ခိုက်ခဲ့ကြပါတယ်။ ကိုးကန့် ဒေသတွင်းမှာက တရုတ်ပြည်တွင်းစစ်ကြောင့် ထွက် ပြေး ခိုလှုံလာတဲ့ တရုတ်ဒုက္ခသည်တွေလည်း ရှိနှင့် နေပါတယ်။ ပြီးတော့ ဗိုလ်ချုပ်ကြီး ချန်ကေရှိတ်ကို သစ္စာခံသူ ဗိုလ်ချုပ် လီဟွမ်နှင့် တပ်ဖွဲ့ဝင်တွေလည်း ရောက်နေပါတယ်။ တရုတ်ကွန်မြူနစ်တို့ရဲ့ ရည်ရွယ် ချက်မှာ ကိုးကန့်ဒေသကို တရုတ်ပိုင်နယ်မြေအဖြစ် သိမ်းပိုက်ယူလို၍ တိုက်ခိုက်နေခြင်းဖြစ်သည်'လို့ ဆိုပါတယ်။ (စာ-၁၀၀)

          တရုပ်ဖြူ ဗိုလ်ချုပ်လီတို့နဲ့ ပူးပေါင်းပြီး တရုတ် ကွန်မြူနစ်တွေကို တိုက်ထုတ်မယ်ဆိုပြီး အောလစ်ယန်း ဟာ လင်ဖြစ်သူ ဒူဝမ်ထံမှ ကိုးကန့်ဒေသကို ကြေးစားလူ သတ်ဗိုလ် 'ဖန်ဝါ'ရဲ့ အကူအညီနဲ့ ပြန်ရောက်လာပါတယ်။ တရုတ်ကွန်မြူနစ်တွေကို တိုက်ဖို့ဆိုတဲ့ အကြောင်းပြချက် နဲ့ အမေရိကန်လက်နက်တွေဟာ ထိုင်ဝမ်မှတစ်ဆင့် ယိုး ဒယားနယ်စပ်ကို ဖြတ်ကျော်ရောက်ရှိလာပါတယ်။ ကွန် မြူနစ်အန္တရာယ်မှ ကာကွယ်ရန် ကိုးကန့်ဒေသကို ကြားခံ နယ်မြေသတ်မှတ်ကာ အမေရိကန်မှ လက်နက်နှင့် ငွေ တွေ အမြောက်အမြား စီးဝင်လာသည်'လို့ ဆိုပါတယ်။ (စာ-၁၄၂)

          မြန်မာပိုင် မုန်းဆတ်မှာ အမေရိကန်တွေ လေယာဉ်ကွင်းဖောက်လုပ်ခဲ့ပြီး စစ်သင်တန်းကျောင်းလည်း ဖွင့်ခဲ့ကြောင်း တရုတ်ကွန်မြူနစ်ကို တိုက်ဖို့ စီစဉ်ခဲ့တာလို့ ဖော်ပြထားပါတယ်။ တရုတ်ဖြူတွေ ကိုးကန့်နယ်ထဲ ဝင် ရောက်လာတော့ ဒေသခံတွေဟာ မိမိတို့ တောင်ယာတွေကို စွန့်ခွာထွက်ပြေးသွားကြရာ အဲဒီတောင်ယာတွေဟာ ဘိန်းခင်းတွေ ဖြစ်လာပါတယ်။ ဘိန်းတွေ အထွက်တိုးလာသလောက် ကိုးကန့်ဘိန်းနှင့် စီအိုင်အေ လက်နက်လဲလှယ်မှုဟာလည်း ပိုများလာခဲ့ပါတယ်တဲ့။

          'အောလစ်ဖ်ကျူးလွန်သော အမှုတွေကလည်း တဖြည်းဖြည်း များလာသည်။ ရွာတွေကို ဓားပြတိုက် သည်။ အောလစ်ဖ် အမိန့်နှင့် မြေခွန်တွေ ကောက်သည်။ အရွယ်ရောက်လာသော ယောက်ျားတွေကို အဓမ္မဆွဲခေါ်ကာ လျှို့ဝှက်တပ်ဖွဲ့ စစ်သားတွေ စုဆောင်းနေသည်' (စာ-၁၆၇)

          ချန်ကေရှိတ်ရဲ့လူ ဗိုလ်ချုပ်လီ(တရုတ်ဖြူ)ဟာလည်း ကွန်မြူနစ်ကို တိုက်ဖို့ထက် ဘိန်းကုန်သည်အကြီး စားကြီးအဖြစ်က ပိုပြီးပေါ်လွင်လာပါတယ်။

          'ဗိုလ်ချုပ်လီ ဦးဆောင်သော လူအင်အား ၃၀၀ ခန့်နှင့်အတူ ဘိန်းအများအပြား သယ်ဆောင်၍ မုန်းဆတ်မှ လျှို့ဝှက်တပ်ဖွဲ့ တပ်စခန်းသို့ ထွက်ခွာလာကြသည်။ ကိုးကန့်ဒေသထွက် ဘိန်းတွေကို ပြည်ပသို့ရောင်းချရာတွင် လိုအပ်သော (ကိုးကန့်စော်ဘွား) ယန်းမိသားစု၏ ကြေးနီတံဆိပ် အမှတ်အသား ရိုက်နှိပ်ထားသော ခွင့်ပြုချက်လည်း ပါလာသည်။ ဗိုလ်ချုပ်လီ ယူဆောင်လာသော ဘိန်းများ၏ အရည်အသွေးမှာ အလွန်ကောင်း မွန်တာကြောင့် ဘိန်းအရောင်းအဝယ်လောကတွင် ထင် ရှားလာကာ ထိုင်းနိုင်ငံမှ ဘိန်းကုန်သည်တွေ ဈေးကောင်းပေး၍ ဝယ်ကြသည်။ မုန်းဆတ်သို့ ရောက်လာသော ဘိန်းတွေကို အထမ်းသမားများဖြင့် သယ်ဆောင်ကာ ချင်းမိုင်မှ မစ္စတာဟိုဆိုသူထံ ရောက်လာသည်။ မစ္စတာဟိုမှာ အမေရိကန်စီအိုင်အေနှင့် ချိတ်ဆက်နေသူဖြစ်သည်။' (စာ-၁၆၉)

          အောလစ်ဖ်ယန်းကတော့ 'ဘိန်းဘုရင်မ' အဖြစ် ပိုပြီးတော့ ပီပြင်လာတယ်။ သူမွေးခဲ့တဲ့ သားကိုတော့ အမေရိကန်ဂျစ်ကားတွေကို သဘောကျလွန်းတဲ့ 'ဂျစ်' လို့ နာမည်ပေးပြီး ဆွေမျိုးတွေ ကြားထားခဲ့တယ်။ (ဂျစ် အရွယ်ရောက်လာတော့ ချင်းမိုင်ကို ထွက်သွားခဲ့ပါတယ်။)

          'ထောက်လှမ်းရေး အစီရင်ခံစာများတွင် အောလစ်ဖ်အမည်ကို အကြိမ်ကြိမ် တွေ့ရသည်။ သံလွင် မြစ်တစ်လျှောက် ကျေးရွာများတွင် ခိုးဆိုးသတ်ဖြတ် လူသတ်ဓားပြ မုဒိမ်းကောင် ဆံရှည်နှင့်အတူ ဒါကိုဒါ လေ ယာဉ်ဖြင့် ယူဆောင်လာသော အမေရိကန် လက်နက် တွေကို လက်ခံခဲ့သူမှာ အောလစ်ဖ်ဖြစ်သည်။ ဧပြီ ၂၃၊ ကုလသမဂ္ဂလုံခြုံရေးကောင်စီ၏ ဆုံးဖြတ်ချက်အရ မြန် မာနိုင်ငံတွင် ကျစ်ရစ်နေသေးသော နိုင်ငံခြားသာတပ်ဖွဲ့ ဝင်တစ်ယောက်မကျန် အမေရိကန်အစိုးရမှ တာဝန်ယူ၍ လေကြောင်းမှ ပြန်ခေါ်ခဲ့ရသည်။ နိုင်ငံတကာ အသိုင်း အဝိုင်း၏ ပြစ်တင်ဝေဖန်ခြင်းများ အများဆုံးခံရသူမှာ အောလစ်ဖ်ယန်းသဖြစ်သည်' (စာ-၁၈၀)

          '၁၉၅၂ အောက်တိုဘာ ဂျစ်ကားကို အော လစ်ဖ်ကိုယ်တိုင် မောင်းနှင်၍ ကုန်သွယ်ရေးစခန်း တစ်ခု သို့ ထွက်ခွာလာရာ လမ်းခုလတ်တွင် မျှော်လင့်မထား သော တရုတ်နယ်ခြား အစောင့်တပ်ဖွဲ့နှင့် ရင်ဆိုင်တိုး တော့သည်။ နယ်ခြားကို တရုတ်အာဏာပိုင်တွေ ပိတ်ဆို့ ၍ အောလစ်ဖ်ယန်းကို ကင်းစခန်းထဲတွင် ချုပ်နှောင်ထား သည်။ ဤတွင် လက်နက်ကိုင် သူပုန်တို့နှင့် အဆက် အစပ်ရှိသည်ဆိုသော သံသယဖြင့် သူမကို မန္တလေး အကျဉ်းထောင်သို့ လွှဲပြောင်းပေးလိုက်သည်' (စာ-၁၇၇)

          'အောလစ်ဖ် အကျဉ်းကျနေစဉ် သူမမွှေးခဲ့ သောမီးတောက်မှာ မည်မျှအထိ ဒုက္ခပေးခဲ့ကြောင်းနိုင်ငံ တကာ အသိုင်းအဝိုင်းမှ သိလာသည်။ ၁၉၅၃ မတ်လအောလစ်ဖ်အကြောင်းနှင့်ပတ်သက်၍ တပ်မတော်မှ စု ဆောင်းထားသော အသေးစိတ်အကြောင်းအရာများ အပါအဝင် ကိုးကန့်တွင် ခြေကုပ်ယူထားသော ကူမင် တန် (သို့မဟုတ်) လျှို့ဝှက်တပ်ဖွဲ့အကြောင်း အစုံအလင်ကို ပါလီမန်သို့ ဂျင်မီနှင့် အက်ဒွပ်တို့ အစီရင်ခံခဲ့ကြသည်။'

          'မြန်မာ့တပ်မတော်ရောက်လာပြီး လွတ် မြောက်လာကြသော ကျေးရွာများတွင် အောလစ်ဖ်နှင့် ဓားပြအဖွဲ့တွေ ကျူးလွန်ခဲ့ကြသော စက်ဆုပ်ဖွယ်ရာဇ ဝတ်မှုအထောက်အထား အများအပြား တွေ့ကြရသည်။ ကူမင်တပ်များ၏ ခြေကုပ်စခန်းကို မြန်မာ့တပ်မတော် သိမ်းပိုက်ခဲ့ပြီးနောက် စခန်းအတွင်း အမေရိကန် သေနတ်များနှင့်အတူ အမေရိကန်အလောင်းတစ်လောင်းနှင့် ပြင်သစ်အမျိုးသားအလောင်းတချို့လည်း တွေ့ရသည်' (စာ-၁၈၀)

          ]ကိုးကန့်သို့ မြန်မာ့တပ်မတော် ချဉ်းကပ်လာ စဉ် သံလွင်မြစ် အရှေ့ဘက်တစ်လျှောက်တွင် လော်စစ် ဟန်နှင့် ကိုးကန့်ကာကွယ်ရေး တပ်တွေ အကူအညီပေး ခဲ့သည်}လို့ ဖော်ပြထားပါတယ်။

          လော်စစ်ဟန်ဟာ အော်လစ်ဖ်ယန်းရဲ့ အနီးကပ်လူယုံတော် ဖြစ်ခဲ့ဖူးတယ်လို့ ဆိုပါတယ်။ '.... ထောင်မှ အောလစ်ဖ် လွတ်မြောက်လာသည့်အခါ ဘိုးဘွားပိုင်မြေ ကိုးကန့်တွင် ယန်မိသားစု၏ အုပ်ချုပ်ရေး အာဏာစက် ပျောက်ဆုံးသွားလေပြီ။

          'အောလစ်ဖ်ဟာ ကျုပ်တို့ မိသားစုအတွက်တော့ တကယ့်ကို ကျိန်စာပါပဲ'

          'လော်စစ်ဟန်ကို အောလစ်ဖ် အယုံကြီးယုံခဲ့တာကြောင့် ယန်မိသားစုတစ်ခုလုံး ဘဝပျက်ခဲ့ကြပုံ၊ မိသားစုပိုင် ငွေကြေးဥစ္စာပစ္စည်းတွေကို မိန်းမတွေကို ပိုးကြေးပန်းကြေးပေးပြီး အောလစ်ဖ်သုံးဖြုန်းခဲ့ပုံတွေ၊ ယန်းမိသားစုမှာ ဘိန်းထုတ်လုပ်ရောင်းချရေးအတွက် တရားဝင်လိုင်စင်ရရှိခဲ့သည့်တိုင် အောလစ်ဖ်လက်ထက် ရောက်ကာမှ တရားမဝင် မူးယစ်ဆေးဝါးရောင်းချနေသူ တွေဘ၀ ရောက်ရကြောင်း စီကာပတ်ကုံးပြောကာ အောလစ်ဖ်ကို မိသားစုတစ်ခုလုံး မကြည့်ချင်တော့ လောက်အောင် စိတ်နာခဲ့ကြောင်း ပြန်ပြောင်းပြောပြနေ သည်' (စာ-၁၅၄)

          ယန်မိသားစုဝင် 'ဖရန်စစ်'ကပြောပြခဲ့တာဖြစ်ပါတယ်။ ဘိန်းဘုရင်မ အောလစ်ဖ်ယန်းဟာ ကိုးကန့် စော်ဘွားမိသားစုအတွက် ကျိန်စာလို့ဆိုရင် ဘိန်း၊ ဘိန်း ဖြူ၊ မူးယစ်ဆေးဝါးတွေဟာ လူသားမျိုးနွယ်တစ်ရပ်လုံးရဲ့ ကျိန်စာဖြစ်နေတာကိုလည်း သတိပြုဖို့ လိုပါလိမ့်မယ်။ အသက် (၉၀) အရွယ်မှာ ဘိန်းဘုရင်မရဲ့ဘ၀ နိဂုံးချုပ်သွားခဲ့ပေမယ့် မူးယစ်ဆေးဝါး ကျိန်စာကတော့ အားကောင်းကောင်းနဲ့ ရှင်သန်နေဆဲ၊ ကမ္ဘာလောကကို ကျိန်စာတိုက်နေဆဲ ဖြစ်ပါတယ်။         ။

မြတ်ဘုန်းသစ်
( TREND News ဂျာနယ် အတွဲ(၂)၊ အမှတ်(၄၅) တွင်ပါရှိသော ဆောင်းပါးအား တဆင့်ပြန်လည်မျှဝေခြင်းဖြစ်ပါသည်။)