၂၀၂၅ ၊ နိုဝင်ဘာ ၂၉

လူရာဝင်ချင်သူများ
    "အရွယ်မရောက်ခင် အစွယ်ပေါက်ချင်တဲ့ ကောင်တွေကြောင့်ပါကွာ"ဟု ကျေးရွာမီးရှို့ခံရသည့် ဖြစ်စဉ်တစ်ခုအပေါ် ပေးထားသည့် မှတ်ချက်ဖြစ်သည်။ မငြိမ်းချမ်းသည့်နေရာ၊ လက်နက်ကိုင်များရှိသည့် နေရာတွင် စစ်၏ဘေးထွက်ဆိုးကျိုး မြို့ပျက်ရွာပျက် ဖြစ်ကြရသည်မှာ မဆန်းပေ။ ထူးဆန်းသည်က ဤကဲ့သို့ ဖြစ်ရပ်မျိုးကို မလွှဲသာမရှောင်သာ ကြုံရခြင်းမဟုတ်ဘဲ သိ သိကြီးနှင့် တိုးဝင်နေကြသည်က ထူးဆန်းသည်ဟု ဆိုနိုင်ပါသည်။ ပိုးဖလံက မီးကို ပူမှန်းမသိ၍ တိုးခြင်းကြောင့် ဘဝပျက်စီး ဆုံးပါးရ သည်က သဘာဝကျသေးသည်။ စစ်ကြောင့် မြို့ရွာ ပျက်စီးမည်၊ အသက်အိုးအိမ် စည်းစိမ် ဆုံးရှုံးမည်ဆိုသည်က သူငယ်တန်းကလေးငယ်ကို သွားမေးလျှင်ပင် သိနိုင်သည့်အဖြစ်မျိုး မဟုတ်လား။
    အညာဒေသ တောင်သာ၊ မြင်းခြံ၊ နွားထိုးကြီး ဘက်တွင်ဖြစ်သည်။ နှစ်ဖက်တိုက်ပွဲ ဖြစ်ပွားအပြီး ကျေးရွာအချို့ မီးလောင်ပြာကျ၍ ကျန်ခဲ့ရသည်။ ထိုမြင် ကွင်းမျိုးကို ရုပ်သံရိုက်၍ လူမှုကွန်ရက်ပေါ်တွင် အပြိုင်အဆိုင် တင်ကြလေသည်။ "ရက်စက်လိုက်ကြတာ"ဆိုသည့် စာသားလေးနှင့် အပြိုင်အဆိုင် တင်ကြခြင်း ဖြစ်သည်။ ဤကဲ့သို့ ဖြစ်ရပ်မျိုးက ဘာကြောင့် ဖြစ်ရသနည်းဆိုသည်ကို တော်လှန်ရေး အားပေးအားမြှောက်ပြုသူများ၊ အားပေးထောက်ခံသူများ၊ တော်လှန်ရေးကို တွန်းအားပေးနေသူများက အကြောင်းရင်းအမှန်ကို အမှန်တကယ် မသိကြ၍လားဟူ၍ပင် မေးခွန်းထုတ်ချင်စိတ်ဖြစ် လာမိလေ သည်။
    ထို မြင်းခြံ၊ တောင်သာ၊ နွားထိုးကြီး စသည့် နေရာများက လက်နက်ကိုင်ခေါင်းဆောင်ဆိုသူ အောင်စိုးတို့၊ Black Tiger တို့ ဆိုသည်မှာ တော်လှန်မီဒီယာများနှင့် တွေ့ဆုံ၍ မည်မျှကြီးကြီးကျယ်ကျယ် ပြောခဲ့ကြသနည်း။ ထိုနေရာဒေသက တော်လှန်ရေးလုပ်သူများမှ မဟုတ်ပါ၊ စစ်ကိုင်းဘက်၊ မန္တလေး စသည့်နေရာများမှစပြီး EAOs အချို့တို့အထိ ကြီးကြီးကျယ်ကျယ် ပြောခဲ့ကြရဲ့ မဟုတ်လား။ မနေ့တစ် နေ့ကမှ လူလားမြောက်လာပြီး နိုင်ငံရေးဆိုသည်ကို နကန်းတစ်လုံးမျှ မသိသည့် ရွှေဘိုဘက်က ပိုင်ချဲ ဆိုသူ၏ အမေးအဖြေများကိုကြည့် ကြည့်၊ အောင်စိုး၊ Black Tiger ဆိုသူတို့၏ အမေးအဖြေ များကိုပဲကြည့် ကြည့်မည်ကဲ့သို့ တိုက်ခိုက်ကြကြောင်း အာပေါင်အာရင်းသန်သန်နှင့် ပြောဆိုနေကြလေသည်။ လုပ်သည့် လုပ်ရပ်က အများသူငါ သွားသည့်လမ်းကို မိုင်းထောင်ခြင်း၊ အင်အားနည်းငယ်သာရှိသည့် ရဲစခန်း ငယ်များကို ချောင်းမြောင်းတိုက်ခိုက်ခြင်း၊ စစ်ကြောင်းအချို့ကို ကြားဖြတ်တိုက်ခိုက်ခြင်းစသည့် အဖျက်အမှောင့်လုပ်ငန်းများကို အဟုတ်ကြီးထင်၍ လုပ်နေကြခြင်းဖြစ်သည်။ "အရွယ်မရောက်ခင် အစွယ်ပေါက်ချင်"ဆိုသည့် ပြဿနာဖြစ်သည်။ သူတို့သက်တမ်းတစ်လျှောက် မည်သည့်အခါကမျှ လူရာ မဝင်၊ လူတစ်လုံး သူတစ်လုံး မဖြစ်ခဲ့ဖူးဘဲ တော်လှန်ရေးလုပ်မှ လူရာဝင်သည့်သဘောကို သာယာနေကြလေသည်။ သူတို့ အစွယ်ပေါက်ချင်သည်က ပြဿနာမ ဟုတ် မြို့ရွာ၊ ရပ်ကွက်အတွင်းမှနေ၍ တိုက်ပွဲဖော် သောကြောင့် မြို့ရွာများ ပျက်စီးသည့်အခါ တော်လှန်ရေးသမားဆိုသူတို့က သူတို့နှင့်မဆိုင်သကဲ့သို့ တိုက် ပွဲနှင့်ဝေးရာသို့ ဖုတ်ဖတ်ခါ၍ ပြေးကြလေသည်။
    ပြီးခဲ့သည့်ရက်ပိုင်းက ရွှေဘို-ဝက်လက်ဘက် တိုက်ပွဲတစ်ခုနှင့်ပတ်သက်ပြီး PDF တွေ ရွာတစ်ရွာကို မီးရှို့ခဲ့သည့် ရုပ်သံတစ်ခု ထွက်ပေါ်လာခဲ့သည်။ သူတို့ ဟာသူတို့ မီးရှို့၍ ထွက်လာသည့်အကြောင်းကို ပြောနေခြင်းဖြစ်သည်။ မီးရှို့၍ ထွက်လာပြီး တပ်မတော်စစ်ကြောင်းလာလျှင် လက်နက်ကိုင်ပြီးဦးစွာ ပြေးကြလေသည်။ စစ်ကြောင်းနှင့် ဝေးရာရောက်မှ သူတို့ မီးရှို့ခဲ့သည်များကို ရုပ်သံရိုက်ကူး၍ "ရက်စက် လိုက်တာ၊ ဘာညာ"ဖြင့် ဝါဒဖြန့် အလှူခံကြလေသည်။ PDF များရှိသည့်နေရာ၊ စုဖွဲ့ ခိုအောင်းသည့်နေရာ၊ PDF များထွက် ပြေးသည့်နေရာအားလုံးက စစ်ဘေးစစ်ဒဏ်သင့်ကာ လူမှုဘ၀ အလုံးစုံ ချွတ်ခြုံကျရလေ သည်မှာ အရှိတရား ပင်ဖြစ်သည်။ လက်ရှိတွင်လည်း တောင်သာနှင့် ရွှေဘို၊ ဝက်လက် ဝန်းကျင်တွင် PDF တို့က တိုက်ပွဲဖော်ဆောင်ရင်း မြို့ရွာပျက်စီးနေမှုများကို မှတ်တမ်းတင်နေကြသည်။ နိုင်ငံရေး၊ စစ်ရေးကို နားလည်ကြသူများက စစ်ပွဲကို မခေါ်ကြပါနှင့်ဟု အကြိမ်ကြိမ်အဖန်ဖန် အတန်တန်တားသည့်ကြားက စစ်ပွဲကို ပျော်ပျော်ကြီး ခေါ်နေသည့် ဒေသများမှာ ပိုးဖလံကဲ့သို့ ပျက်စီးခြင်းများသာ ကြုံရဦးမည်ဖြစ် သည်။ လုပ်ချင်ရာလုပ်ပြီး ရက်စက်လိုက်တာဟု ပြောနေခြင်းသည် အဖြေမဟုတ်။ စစ်ဖြစ်ရခြင်း အ ကြောင်းအရင်းမှန်ကို ရပ်တန့်နိုင်မှ ပြည်သူ့ဘ၀ သက်သာရာရတော့မည်ဟု မြို့ရွာများထဲက တိုက်ပွဲဖော် နေသည့် လက်နက်ကိုင်များကို ပြောရတော့မည်ဖြစ်သည်။ 

အသက်ငင်နေသည့် ချင်းတွင်း
    မိုးကုန်၍ ဆောင်းတွင်းသို့ ချဉ်းနင်းဝင်ရောက်လာချိန် မြစ်ကြောင်းများသည် ရေနည်းပါး၍လာကြ၏။ ထိုကဲ့သို့ မြစ်ရေနည်းပါးလာသည်နှင့်အမျှ မြစ်ကြောင်းအတွင်းက ရွှေတူးဖော်သူတို့လုပ်ငန်းများ စတင်လာကြလေသည်။ လတ်တလော ရွှေတူးဖော်မှု အများဆုံးပြုလုပ်သည့်နေရာ၊ နာမည်ကြီးနေသည့် နေရာက မင်းကင်းမြို့နယ် လောင်းပြည့်ကျေးရွာအနီး ချင်းတွင်းမြစ်ကြောင်းတစ်လျှောက် နေရာတွင် ဖြစ်လေသည်။ ထိုနေရာ မြစ်ကြောင်းတစ်လျှောက်တွင် ရွှေတူးဖော်မှု ဘယ်လောက်လုပ်သလဲဆိုရင် မြင်ရသူတိုင်းက မြစ်ကြောင်းပိတ်သွားမည်ကိုပင် စိုးရိမ်နေရသည်အထိ ဖြစ်လာနေသည်။ ထိုဒေသကို စိုးမိုးနေသည့် PDF များက မြစ်ကြောင်းတစ်လျှောက် ဖြတ်သန်းသွားလာသည့် စက်လှေ၊ မော်တော် ယာဉ် စသည်တို့ကို အဆမတန် ဆက်ကြေးလည်း ကောက်ကြသည်။ မြစ်ကြောင်းတစ်လျှောက် ရွှေတူးဖော်နေခြင်းမှလည်း ဆက်ကြေးအဆမတန် ကောက်ခံလျက်ရှိကြောင်း ဒေသခံများထံမှ သိရသည်။ မြစ်ကြောင်း တစ်လျှောက် ဖြတ်သန်း၍ ကုန်စည်ကူးသန်း ရောင်းဝယ်သူများက ရွှေတူးဖော်မှုကြောင့် ကောင်းကောင်း မွန်မွန်ပင် ဖြန်သန်း၍ သွားလာမရတော့ကြောင်း ညည်းညူပြောဆိုရသည်အထိ ရွှေးတူးဖော်မှုလုပ်ငန်း များ အကြီးအကျယ် လုပ်နေကြသည်ဟုဆိုသည်။ ရွှေတူးဖော်သူများကလည်း PDF များ တောင်းသည့် လစဉ်ကြေး ပြည့်မီစေရန်နှင့် ကိုယ့်အတွက် အမြတ်ကျန်စေရန် အင်တိုက်အားတိုက် တူးဖော်မှ တွက်ခြေ ကိုက်သည်ဟု ဆိုလေသည်။ "အဖွဲ့အစည်းတွေကို တစ်လတစ်ခါ ငွေပေးရတာ။ မပေးရင် ဖောင်အသိမ်း ခံရတာ"ဟု ရွှေ မျောဖောင်လုပ်ငန်း လုပ်ကိုင်သူတစ်ဦးက ဆိုသည်။
    အဖွဲ့အစည်းများကို တစ်လတစ်ခါ ငွေသွင်း ရသည်ဆိုသည်မှာ NUG လက်အောက်ခံ ပသုံးလုံး၊ ပအဖ၊ ပကဖ တို့ကို ပေးသွင်းရခြင်းဖြစ်သည်။ ထိုအဖွဲ့များက လစဉ်ကြေး ကောက်ခံသကဲ့သို့ မြစ်တွင်း ဖြတ်သန်းသွားသည့်ယာဉ်များကိုလည်း ဆက်ကြေးအဆမတန် ကောက်ခံနေကြသည်။ ထိုသို့ လိုသလို ကောက်ခံနေသည့်ကြားမှ သူတို့ စိတ်မထင်လျှင် မထင်သလို ရွှေမျောဖောင် သိမ်းယူခြင်း၊ ယာဉ်ပေါ်ပါသည့် ပစ္စည်းသိမ်းယူခြင်းများ စိတ်ရှိတိုင်း လုပ်ကြသည်ဟု ဆိုသည်။ ထိုထက်ပို၍ ဆက်ကြေး ကောက် နေပါလျက်နှင့် ၎င်းတို့ စိတ်မထင် သည့်အခါမျိုးတွင် မြစ်ကြောင်းကိုပါ သွားလာခွင့်ပိတ် လိုက်သည့် အခါမျိုး လုပ်တတ်ကြောင်း မော်လိုက်ဒေသခံ တစ်ဦးကဆိုသည်။ "အခွန်လည်း ကောက်တယ်၊ အခွန် လည်းလို ချင်တယ်ပြောတယ်။ မြစ်ကြောင်းလည်း ပိတ်ထားတော့ ဘာလုပ်စားကြမှာလဲ။ ပြည်သူ့အတွက် ပြောပြီး လမ်းကြောင်းပိတ်ထားတာ"ဟု မော်လိုက်ဒေသခံတစ်ဦးက ဆိုသည်။
    ထိုသို့ မြစ်ကြောင်းပိတ်ထားရာတွင် ရှစ်လတိတိ ပိတ်ထားခြင်းပင် ကြုံတွေ့ရဖူးသည်ဟု ဆိုသည်။ မြစ်ကြောင်းကို ပိတ်ဆို့လိုက်သည့်အခါ မြစ်ကြောင်းအသုံးပြု၍ ကုန်စည်ကူးသန်းရောင်းဝယ်ရေး ရပ်တန့်သွားသော်လည်း ကုန်းလမ်းမှ မော်တော်ဆိုင်ကယ်ဖြင့် တစ်နိုင်တစ်ပိုင် သယ်ယူပို့ဆောင်သည့်လုပ်ငန်း လုပ်ကိုင်ကြသည်ဟု ဆိုလေသည်။ အဓိက သယ်ယူမှုမှာ စားသောက်ကုန်ထက် စက်သုံးဆီကို ပိုမို သယ်ယူရောင်းချ ကြသည်ဟုဆိုသည်။ ထိုကဲ့သို့ မြစ်ကြောင်းကို လိုသလို အဖွင့်အပိတ် လုပ်ခြင်းများ၊ မြစ်ကြောင်းတစ်လျှောက် ရွှေမျောအလွန်အကျွံ ထုတ်ယူတူးဖော်မှုများကြောင့် မည်သူတွင် အကျိုးအမြတ် ရှိနေသနည်းဟုဆိုလျှင် ထိုဒေသရှိ ပသုံးလုံး၊ ပအဖ၊ ပကဖ လက်နက်ကိုင်များတွင်သာ အကျိုးအ မြတ်များစွာ ရရှိနေပြီး ဒေသခံများမှာ စားဝတ်နေရေး ပိုမို ကျပ်တည်းလာသည်ဟု ဆိုသည်။ အဆိုးရွား ဆုံးအချက်မှာ သဘာဝပတ်ဝန်းကျင် ထိခိုက်မှုနှင့် မြစ်ကြောင်းပျက်စီးမှုက သိသိသာသာ ဆိုးရွားလာ နေပြီဖြစ်သည်။ ဟိုးလွန်ခဲ့သည့် နှစ်များက ချင်းတွင်းမြစ်ရေသည် မိုးကုန်၍ ဆောင်းရောက်လာလျှင် အေးမြကြည်လင်သည့်ရေများသာ စီးဆင်းနေသော်လည်း ယခုအခါ ရာသီမရွေး ကော်ဖီရောင်ရေများ စီးဆင်းနေလေသည်။
    ပြီးခဲ့သည့် ရက်ပိုင်းက မင်းကင်းမြို့နယ် လောင်းပြည့်ကျေးရွာ ချင်းတွင်းမြစ်ကြောင်းအတွင်း ရာပေါင်းများစွာရှိသော ရွှေတူးဖော်သည့် စက်လှေတစ်စင်းဗုံးနှင့် တိုက်ခိုက်ခံရသည်။ မြစ်အတွင်းတွင် မည် မျှတူးဖော်ကြသနည်းဟုဆိုလျှင် ထိုဗုံးနှင့် တိုက်ခိုက်ခံရသည့် ရုပ်သံဖိုင် လူမှုကွန်ရက်တွင် ပျံ့နှံ့လာချိန်တွင်   "ဘယ်အဖွဲ့အစည်းကပဲ တိုက်ခိုက် တိုက်ခိုက် ကျေးဇူးတင်တယ်"ဟု ဝိုင်း၍ ပြောကြလေသည်။ ချင်းတွင်း၏ အသက်ဓာတ်ကို စုပ်ယူပြီး တော်လှန်ရေးအတွက်ဟု ဗန်းပြ လုပ်ကိုင်နေသူများကို အလိုမရှိတော့သောသူများ၏ အားပေးစကားသံလည်း ဖြစ်သည်။ အသက်ငင်နေသော ချင်းတွင်းမြစ်ကို ကယ်တင်ရန်မှာ လက်နက်ကိုင်များ ထိုဝန်းကျင်တွင် မရှိမှဟူသော အသိကို ပြည်သူများ ကိုယ် တိုင် မျက်ဝါးထင်ထင် တွေ့မြင်၍ သိလာသည်ဟု ဆိုရပါလိမ့်မည်။

တော်လှန်ရေးပြီးသွားပြီဟု ယုံကြည်ကြသူများ
    တော်လှန်ရေးဟု ကြွေးကြော်၍ အဖျက်အမှောင့်လုပ်ငန်းများ လုပ်ကိုင်လာခဲ့ရာ ငါးနှစ်ဝန်းကျင်ခန့်သို့ပင် ရောက်ရှိလာပြီဖြစ်သည်။ ထိုကာလတစ်လျှောက်လုံး တော်လှန်ရေးသွေးမအေးရန်ဟုဆိုကာ အမျိုးမျိုး မြှောက်ပင့် သွေးထိုးလာခဲ့သော်လည်း အနှစ်ချုပ်ရလဒ်အရ ပြည်သူ့ဘ၀ ထိ ခိုက်နစ်နာမှုသာ အဖတ်တင်ကျန် ရစ်ခဲ့ရသည်ကို ကောင်းကောင်းနားလည်လာကြလေသည်။ ထိုသို့ နားလည်လာကြ သူများက တော်လှန်ရေးကို အားပေးထောက်ခံ၊ ထောက်ပံ့ရင်း အသက်အိုးအိမ်စည်းစိမ်သာ ပျက်စီးကြ ရသူများ ဖြစ်သည်။ တော်လှန်ရေးခေါင်းစဉ်ကြောင့် တော် လှန်ရေးကို စိတ်မဝင်စားသည့်သူများလည်း မအေးချမ်းသည့် မိမိဒေသများကို စွန့်ခွာ၍ ထွက်ပြေးနေရသည်က ကာလအတန်ကြာပြီ ဖြစ်သည်။ ယင်းကဲ့သို့ နှစ်ရှည်လများ နေရပ်စွန့်ခွာရ သူများက မိမိနေရပ်ဒေသသို့ ပြန်၍ နေထိုင်လိုသူများ၊ အလည်အပတ် ခရီးသွားလိုသူများက တော်လှန်ရေး မြှောက်ပင့်သွေးထိုးသူများနှင့် တော်လှန်သူများကို ရွံမုန်းလာ ကြသည်။ လက်ရှိအခြေအနေက မြေစမ်းခရမ်း ပျိုးဆိုသကဲ့သို့ ကိုယ့်အရပ်ကိုယ့်ဒေသသို့ စနည်းနာသည့် သဘောဖြင့် သွားလာကြသူများကိုလည်း တွေ့မြင်လာရသည်။
"တော်လှန်ရေး ပြီးပြီ၊ မပြီးဘူးဆိုတာ တော်လှန်ရေးသမားတွေကိုကြည့်ပြီး ဆုံးဖြတ်ရတာမဟုတ်ဘူး။ ဒေသမှာရှိတဲ့ စီးပွားရေးသမားတွေကြည့်ရင် သိတယ်။ သူတို့က ရွေးကောက်ပွဲပြီးရင် ဘာလုပ်ငန်း တွေလုပ်မယ်ဆိုပြီး စီးပွားရေးအတွက် ပြင်ဆင်နေကြပြီ"ဟု မအေးချမ်းဘူးဟု နာမည်ကျော်သည့် နေရပ်သို့ ပြန်သွားသူတစ်ဦးက ပြောသည်။ သူဆိုလိုသည်က တော်လှန်ရေးပြီး၊ မပြီး ဆိုသည်ကို တော်လှန်ရေး သမားများနှင့် အားပေးထောက် ခံသူတို့ကိုကြည့်၍ ဆုံးဖြတ်လျှင် ဘယ်သောအခါမျှ ပြီးနိုင်မည်မဟုတ်ကြောင်း သူတို့က တော်လှန်ရေးဆိုသည်မှာ လုပ်စားရန် အခွင့်အရေးတစ်ရပ်အဖြစ် အသုံးချကာ လုပ်ငန်းသဘော ဖြစ်နေသည်ဟု ဆိုသည်။ ဒေသတစ်ခု၏ အခြေအနေနှင့် ပတ်သက်လျှင် ဒေသတွင်းနေသူ အတူတူထဲမှ စီးပွားရေးသမားက ပို၍ အမြော်အမြင်ရှိသည်ဟု ဆိုသည်။ သူငယ်ချင်းဖြစ်သူ၏စကားနှင့်ဆိုလျှင် "အဆိုးတွေပြီးရင် အ ကောင်းတွေ လာတော့မှာပါ"ဟု ဆိုသည့်အတိုင်း ရွေးကောက်ပွဲအပြီးကို မျှော်လင့်နေကြသည်။ မြန်မာပြည်အပြောင်းအလဲက နွေဦးမရောက်ခင် ဆောင်းကုန်သည်နှင့် သိသာမည် ဟု ဆိုလေသည်။ သူပြောသည့် စကားအတိုင်း ကိုယ့်ရပ်ကိုယ့်ဒေသသို့ အေးချမ်းစွာနှင့် နေထိုင်နိုင်ကြ ပါစေဟုသာ။
(ရွှေထီး)  
(TREND News ဂျာနယ်အတွဲ(၄)၊ အမှတ်( ၄၅ ) တွင်ပါရှိသော ဆောင်းပါးအား တဆင့်ပြန်လည်မျှဝေခြင်းဖြစ်ပါသည်။ )