၂၀၂၅ ၊ နိုဝင်ဘာ ၂၈
    ထူးမြတ်နဲ့ သက်တူရွယ်တူတွေ ဆိုရင်တော့ WWE နပန်းတွေကို ကောင်းကောင်း ကြည့်ဖူးကြမည် ထင်သည်။ မှတ်မှတ်ရရ အထက် တန်းကျောင်းသား ဘဝတွေကစပြီး WWE နပန်းပွဲတွေကို စကြည့်ဖူးသည်။ တစ်ယောက်နဲ့တစ်ယောက် အားရပါးရ ကိုင်ပေါက်၊ တွေ့သမျှ ပစ္စည်းတွေနဲ့ ရိုက်နှက်ကြတဲ့ နပန်းပွဲတွေက ဆယ်ကျော်သက်အရွယ်မှာ အကြိုက်တွေ့ခဲ့သည်။ တစ်ခါတလေ အများနဲ့တစ်ယောက် ဆော်ပလော်တီးကြသည်။တစ်ခါတလေ တစ်ဖွဲ့နဲ့တစ်ဖွဲ့ ဆော်ပလော်တီးကြသည်။ ထိုနပန်းပွဲတွေကို ကောင်းကောင်းကြည့်ဖူးသူတွေဆိုရင်တော့ ထူးမြတ်ပြောတာ နားလည်မည်ထင်သည်။ ထိုနပန်းပွဲတွေက တစ်ပွဲတည်း ကြည့်ရုံဖြင့် ရှေ့ပွဲမှာ ဘယ်လိုရန်စတွေရှိသဖြင့် ခုပွဲမှာ ဘယ်သူနဲ့ဘယ်သူ ထိုးသတ်ကြ မည်ကို မသိနိုင်ပေ။ ဇာတ်လမ်းတွဲတစ်ခုလိုကြည့်မှ သဘောပေါက်နားလည်သည်။ ဒါကြောင့်လည်း WWE နပန်းပွဲတွေကို မြန်မာပရိသတ်တွေ အကြိုက်တွေ့ ကြတာ ဖြစ်သည်။ ထိုစဉ်က ခုလို MMA ကစားနည်းကို စီစဉ်သည့် ပရိုမိုးရှင်းတွေ မရှိသေးပေ။ ထို့ကြောင့် ဘောလုံးပွဲတွေပြီးရင် WWE က ပရိသတ်အားပေးမှု အရဆုံးပွဲ ဖြစ်သည်။ နပန်းအားကစားသမားတွေကလည်း ကမ္ဘာ့နိုင်ငံအသီးသီးက ကစားသမားတွေဖြစ် တာကြောင့် ကမ္ဘာတစ်ဝန်း အားပေးသူများကြသည်။ ထူးမြတ်ဆိုရင် လက်ဖက်ရည်ဆိုင်မှာ စလောင်းဖြင့် ပြသော နပန်းပွဲတွေ ကြည့်ရတာ အားမရသဖြင့် ဗွီစီဒီအခွေတွေ အပိုင်းလိုက် ဝယ်ကြည့်သည်အထိ အာပေးကြမ်းခဲ့သည်။
    ပြောချင်တာက ခုမှစတာဖြစ်သည်။ WWE နပန်းပွဲတွေက နုကြည်တို့၏ တော်လှန်ရေးနဲ့ အတူတူ ပင်ဖြစ်သည်။ ဘာဆိုင်လို့လဲကွာဟု ပြောကြမည် ထင်သည်။ စာကို ဆုံးအောင်ဖတ်ပါခင်ဗျာဟု မေတ္တာ ရပ်ခံလိုသည်။ WWE နပန်းပွဲတွေမှာ မျက်နှာဖုံးတပ်ပြီး ထိုးသတ်သော ၆၁၉ ဟု အမည်ပြောင် ပေးထား သော ကစားသမားတစ်ယောက် ရှိသည်။ သူ့မျက်နှာကို ပရိသတ်တွေကလည်း မြင်ဖူးချင်ကြသည်။ ဒါကို ပွဲစီစဉ်သူ တွေကလည်း ကောင်းကောင်းသိသည်။ ဒါက ဆွဲဆောင်မှု ဖြစ်သည်။ ဒီတော့ ပြိုင်ဘက်ကစားသမားတွေနဲ့ နပန်းသတ်ရင် ထိုကစားသမား၏ မျက်နှာဖုံးကို ဆွဲခွာဖို့နည်းမျိုးစုံနဲ့ ကြိုးစားကြသည်။ တစ်ယောက်မှ အောင်အောင်မြင်မြင် မျက်နှာဖုံး မခွာနိုင်ကြဘဲ ပရိသတ်တွေ မတင်မကျဖြင့်  ကစားသမားတွေသာ ဒေါ်လာသန်းပေါင်းများစွာ ရပြီး ချမ်းသာသွားကြသည်။ နုကြည်တို့၏ တော်လှန် ရေးကလည်း အဆိုပါ နပန်းသမားနဲ့ ခပ်ဆင်ဆင်တူသည် တော်လှန်ရေးမျက်နှာဖုံးကြီး တပ်ပြီး ဟိုလူက ဆွဲခွာတော့ မယောင်၊ ဒီလူက ဆွဲခွာတော့ မယောင်နဲ့ ပရိသတ်တွေ ရင်တမမဖြင့် ဒေါ်လာသန်းချီ မသွား လေတော့သည်။
    နောက် နုကြည်၏ တော်လှန်ရေးခေါင်း ဆောင်ကြီးတွေက WWE နပန်းသမားကြီး Undertaker နဲ့ လည်း ဆင်တူသည်။ ထိုနပန်းသမားက နပန်းသမားထဲတွင် ပါဖောမန့် တော်တော်လေးကောင်းသည်။ နပန်းထိုးသတ်ရာ စင်မြင့်သို့ လာရောက်ရာတွင် အားက စားရုံတစ်ခုလုံးကို မီးအမှောင်ချလိုက်သည်။ ပြီးရင် ခေါင်းလောင်းသံ တဒေါင်ဒေါင်ဖြင့် အခေါင်းကြီးထမ်းပြီး ထွက်လာသည်။ တစ်ခါတလေ အခေါင်း ထဲမှာ အိပ်ပြီး လိုက်ပါလာလေ့ရှိသည်။ မြန်မာမျက်စိနဲ့ကြည့်တော့ နိမိတ်မရှိ နမာမရှိဟု တွေးတတ်ကြ သည်။ လုပ်ပုံကလည်း အဆန်းဖြစ်သည်။ တိုက်ခိုက်ရေးကစားနည်းဆိုတာက အသက်အန္တရာယ် နီးကပ် လှသည်။ မတော်တဆဆိုတာမျိုး ဖြစ်တတ်သည်။ ဒီလိုကစားနည်းကို အခေါင်းကြီး ထမ်း ဝင်လာတယ် ဆိုတော့ တော်ရုံတန်ရုံလူ သွေးပျက် သွားနိုင်သည်။ နိမိတ်မရှိ နမာမရှိတာတွေ ခဏထား အခေါင်းကြီး ထမ်းပြီး ဒေါ်လာတွေ ရှာသွားသော နပန်းသမားကြီးလိုပဲ အုတ်ဂူနီနီလေးတွေ လက်ညှိုးထိုးကာ ဒေါ်လာတွေ ရသွားသော နုကြည်တော်လှန်ရေးခေါင်း ဆောင်ကြီးတွေ ကြီးပွားသွားကြပြီ ဖြစ်သည်။ ဒါကြောင့် WWE စီးပွားရှာနည်းနဲ့ နုကြည် ခေါင်းဆောင်တွေစီးပွား ရှာနည်းက ခပ်ဆင်ဆင်တူသည်။
    မှတ်မှတ်ရရ နပန်းသမားသုံးဦးကိုလည်း ယနေ့ထိ မှတ်မိနေဆဲဖြစ်သည်။ အဖွဲ့လိုက် နပန်းသတ် ကစားနည်းတွင် ထိုကစားသမားသုံးယောက်က ပြောက်ကျားယူနီဖောင်းကြီးတွေ အပြည့်အစုံဝတ်ပြီး စင်ပေါ်သို့တက် လာလေ့ရှိသည်။ မသိရင် အမေရိကန်စစ်သားကြီးတွေလိုပင် ဖြစ်သည်။ ကျည်ကာအင်္ကျီ တွေဝတ်ဆင်ပြီး နပန်းလာသတ်လေ့ရှိသည်။ ဒီကောင်တွေ စတိုင်မိုက်တယ်ဆိုပြီး ထူးမြတ်တို့လို နပန်း ပွဲဝါသနာရှင်တွေ အားပေးကြသည်။ နပန်းသမားတွေက စစ်သားယောင်ဆောင်ပြီး ထိုးသတ်ကြေး ဒေါ်လာတွေ တစ်ပွေ့တစ်ပိုက်ရသွားပုံက ခုခေတ် တော် လှန်ရေးခေါင်းဆောင်ကြီးတွေ နယ်စပ်မှာ ပြောက်ကျားဝတ်စုံဝတ်ပြီး ငွေရှာကြသလိုပင်ဖြစ်သည်။တစ်ခါတလေ နပန်းပွဲတွေ ကြည့်ပြီး ဂျင်းမိတတ်သေးသည်။ အချို့ကစားသမားတွေက စင်ပေါ်တက် မိုက်က ရိုဖုန်းကြီးကိုင်ကာ တစ်ဖက်က ပြိုင်ဘက်ကို အားရပါးရ စိန်ခေါ်လေ့ရှိသည်။ ပရိသတ်တွေကလည်း ပြိုင်ဘက် ကစားသမားထွက်လာပြီး အကြိတ်အနယ် ပွဲကြီးပွဲကောင်း ကြည့်ရတော့မယ်ဟုဆိုကာ စောင့်ကြည့်ကြသည်။ ဒီလိုဆိုရင် မိုက်က ရိုဖုန်းကြီးကိုင်ကာ စကားကြီးစကားကျယ်တွေကို ၁၅ မိနစ်လောက်ပြောပြီး မိုက်ကရို ဖုန်းကြီးပစ်ချကာ စင်ပေါ်က ပြန်ဆင်းသွားတတ်ကြသည်။ ပရိသတ်ကတော့ အီလည်လည်ကြီး ကျန်ခဲ့ကြသည်။ နုကြည် ခေါင်းဆောင်ကြီးတွေလည်း ထိုကဲ့သို့ပင်ဖြစ်သည်။ တော်လှန်ရေးကြီးက ခြောက်လနဲ့ ပြီးတော့မယောင်၊ နှစ်ကုန်ရင်ပဲ တော်လှန်ရေးပြီးတော့မယောင် ဘာကြီး နိဂုံး ၂၀၂၃ တို့၊ ရှေ့ကိုဆက်သွား ၂၀၂၅ တို့ဖြင့် လေ တစ်လုံး မိုးတစ်လုံးပြောပြီး ဟုတ်တော့မယောင်ဖြင့် စင်ပေါ်က ဆင်းသွားသော နပန်းသမားများနှင့်တောင် တူသေးသည်။
    တစ်ခါတလေ တော်လှန်ရေးခေါင်းဆောင်ကြီးတွေက နပန်းပွဲတွေထဲက Money Bank ဆိုသည့် ကစားပွဲတွင် ဝင်ရောက် ယှဉ်ပြိုင်ကြသော နပန်းသမားများနဲ့တောင် ဆင်တူသေးသည်။ WWE နပန်းပွဲစီ စဉ်သူက ကြိုးဝိုင်းအထက် ၁၀ ပေလောက် မြင့်သည့်နေရာတွင် ဒေါ်လာတွေ ထည့်ထားသော အိတ်တစ် လုံးကို Money Bank ဟု ရေးသားကာ ချိတ်ဆွဲထားပြီး စင်ပေါ်မှာ ခေါက်လှေကားလေးတစ်ခု ချထားပေးသည်။
    ဒီလိုဆိုရင် နပန်းပွဲက ကစားသမားတွေ အားလုံးစင်ပေါ်ကို တက်လာကြပြီး မိတ်ဆွေ၊ ညီအစ်ကို၊ ဘော်ဒါတွေဘာတွေ အထာမထားကြတော့ဘဲ တစ်ယောက်နဲ့တစ်ယောက် မူးမေ့အောင် ဆော်ပလော်တီး ကြလေတော့သည်။ ကစားသမားတစ်ယောက်က လှေကားလေးထောင်ပြီး ပိုက်ဆံအိတ်ရှိရာကို တက်ရန် ကြိုးစားရင် နောက်တစ်ယောက်က လှေကားကို တွန်းထုတ်လိုက်ရင် အပေါ်က ကစားသမား ခွေးကျ ကျလေတော့သည်။
    ဒေါ်လာအတွက်ဆိုရင် အထာမထားဘဲ တစ်ယောက်နဲ့တစ်ယောက် အထာမထားတော့ဘဲ အလုအယက် ဖြစ်ကြပုံများ အမေရိကား အရောက်သွားပြီး အိမ်အလုအယက်ဝယ်ရေး ကြိုးပမ်းပြီး တစ်ယောက်နဲ့ တစ်ယောက် အောက်ဖဲလှန်နေသော တော်လှန်ရေးခေါင်းဆောင်ကြီးတွေအလား ထင်မှတ်ရ လေသည်။
    အသက်အရွယ်လေးရလာတော့ ငယ်ငယ်က ကြိုက်ခဲ့သော နပန်းပွဲတွေကို မကြည့်ဖြစ်တော့ချေ။ ထူးမြတ်လိုပဲ တစ်ကမ္ဘာလုံးက တကယ်ထိုးသတ်ပြသည့် MMA လို ပရိုမိုးရှင်းတွေကို လူကြည့်များလာ ကြသည်။ 
    WWE က ဇာတ်လမ်းတွေဆင်ပြီး လုပ်ပွဲတွေ ဆိုတာ သိလာတော့ တစ်စတစ်စ ကလေးကြိုက်ပွဲများ ဖြစ်လာပြီး ကြည့်ရှုမှုနှုန်း ကျဆင်းလာသည်။ ကလေးတွေကိုသာ လိမ်လို့ရပြီး လူကြီးတွေကို ကြာရှည် လိမ်လို့မရမှန်း သိလာတော့ WWE စီစဉ်သူတွေက ကလေးတွေကိုသာ ပစ်မှတ်ထားလိမ်လို့ရအောင် ဟီးရိုး ဇာတ်ကောင်ဆန်ဆန် ဖရိုဖရဲ နပန်းသမားတွေကို ပွဲသွင်းလာကြသည်။ ပေးချင်တဲ့မက်ဆေ့ချ်ကတော့ WWE နဲ့ နုကြည်တို့က အတူတူပင်ဖြစ်ပြီး အားလုံးက လိမ်ဆင်များသာဖြစ်သည်။ ထူးမြတ်

(TREND News ဂျာနယ်အတွဲ(၄)၊ အမှတ်( ၄၅ ) တွင်ပါရှိသော ဆောင်းပါးအား တဆင့်ပြန်လည်မျှဝေခြင်းဖြစ်ပါသည်။ )

TREND News Journal PDF File Download Link