ကျန်းမာရေးဝန်ကြီးဌာနမှ သဘာဝဘေးအန္တရာယ် ကျရောက်နိုင်သည့်ဒေသများရှိ ဆေးရုံများ နှောင့်နှေးမှုမရှိစေရေး စီစဥ်ထားရန် အသိပေး
၂၀၂၃ မေ ၈
ကျန်းမာရေးဝန်ကြီးဌာနမှ သဘာဝဘေးန္တရာယ်ကျရောက်သည့် မည်သည့်ဒေသအတွင်းရှိ ဆေးရုံများ အရေးပေါ်ကျရောက်လာပါက အဆင်သင့်စီစဉ်ထားရန် ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းက မေလ (၇) ရက်နေ့က ပြုလုပ်သော အစည်းအဝေးတွင် ပြောကြားခဲ့သည်။
သဘာဝဘေးအန္တရာယ်ကျရောက်နိုင်သည့် ဒေသများအတွက် လိုအပ်နိုင်သည့် ဆေးနှင့် ပစ္စည်းကိရိယာများ၊ အရေးပေါ်သုံးဆေးသေတ္တာများ၊ မိသားစုသုံးပစ္စည်းများ၊ မီးဖွားရန်အတွက် ပစ္စည်းများနှင့် အမျိုးသမီးသုံးပစ္စည်းများအား ကျေးလက်ဒေသကျန်းမာရေးဌာနခွဲများသို့ ကြိုတင်ဖြန့်ဝေပေးထားရန် ဒေါက်တာသက်ခိုင်ဝင်းမှဆိုသည်။
ဆေးရုံများ၌လည်း အရေးပေါ်ခွဲစိတ်ကုသမှု၊ မွေးဖွားမှု အပါအဝင် ကုသမှုလုပ်ငန်းများ နှောင့်နှေးပျက်ကွက် မှုမရှိစေရန် အစီအစဥ်များ ချမှတ်ကာ ဆောင်ရွက်ထားရန်လိုကြောင်း ၎င်းမှ ဆက်လက်ပြောဆိုထားသည်။
အလားတူ အဆိုပါကာလအတွင်း အရေးပေါ်လူနာလွှဲပြောင်းရန် လမ်းကြောင်းများကိုလည်း နှီးနွယ်ဌာနဆိုင်ရာများ နှင့် ညှိနှိုင်းတိုင်ပင် ဆောင်ရွက်ထားရန် ပြည်ထောင်စုဝန်ကြီးမှ တိုက်တွန်းပြောဆိုခဲ့သည်။
ပြည်သူ့ကျန်းမာရေးနှင့် ကုသရေးဦးစီးဌာနများ အနေဖြင့် တပ်မတော်ဆေးတပ်ဖွဲ့များနှင့် ပူးပေါင်းဆောင်ရွက်ရန် ၎င်းမှ ဆက်လက်ပြောဆိုထားသည်။
လက်ရှိတွင် ကျန်းမာရေးဝန်ကြီးဌာန၏ ပြည်သူ့ကျန်းမာရေး အရေးပေါ်အခြေအနေ ကွပ်ကဲမှုစင်တာနှင့် တိုင်း ဒေသကြီး၊ ပြည်နယ်များရှိ ပြည်သူ့ကျန်းမာရေး အရေးပေါ်အခြေအနေ ကွပ်ကဲမှုစင်တာများကို ဖွင့်လှစ်ထားပြီး ဖြစ်ရာ အချိန်နှင့်တစ်ပြေးညီ ဆက်သွယ်နိုင်ကြောင်း ပြည်ထောင်စုဝန်ကြီး ဒေါက်တာသက်ခိုင်ဝင်းက အသိပေး ပြောဆိုခဲ့သည်။
Total Views ~ 916
