ရန်ကုန်၊ နိုဝင်ဘာ ၂၇
၂၀၂၅ ခုနှစ် ပါတီစုံဒီမိုကရေစီ အထွေထွေရွေးကောက်ပွဲဝင်ရောက်ရခြင်းမှာ တိုင်းပြည် ငြိမ်းချမ်းစေလိုသည့် ရည်ရွယ်ချက်ဖြစ်ပြီး အဆိုပါ ရည်ရွယ်ချက်ကို ဦးစားပေးဆောင်ရွက်ရမည်ဖြစ်ကြောင်း ဖက်ဒရယ်ဒီမိုကရက်တစ်ပါတီ ဒုဥက္ကဋ္ဌ ဦးရန်နိုင်ဝင်းက ပြောကြားလိုက်သည်။
"ကျွန်တော်တို့ပါတီရဲ့အဓိက ရည်ရွယ်ချက်က တိုင်းပြည်ငြိမ်းချမ်းစေချင်တယ်။ ဒါကြောင့် ငြိမ်းချမ်းစေချင်တဲ့ ရည်ရွယ်ချက်ကို ဦးစားပေး ဆောင်ရွက်မယ်။ ဘာကြောင့်လဲဆိုရင် တိုင်းပြည်က မငြိမ်းချမ်းရင်ဘာမှ လုပ်လို့မရဘူး။ ဒါကြောင့် ငြိမ်းချမ်းချင်တာ။ ငြိမ်းချမ်းအောင် ပါတီအနေနဲ့ ဆောင်ရွက်မယ်။ ဘယ်လောက်ပဲ တိုက်ပွဲတွေဖြစ်ပါစေ၊ တစ်ဖက်နဲ့တစ်ဖက် ဘယ်လိုပဲ ဖြစ်နေပါစေတကယ် ဒုက္ခရောက်တာက ပြည်သူတွေပါ။ ပြည်သူတွေရဲ့ မျက်နှာကြည့်ပြီး တိုင်းပြည်ငြိမ်းချမ်းအောင် ဆောင်ရွက်ဖို့ ပါတီအနေနဲ့ သန္နိဋ္ဌာန်ချမှတ်ထားပါတယ်"ဟု ၎င်းက ပြော သည်။
ငြိမ်းချမ်းရေးသာရမယ်ဆိုရင် ဖွံ့ဖြိုးတိုးတက်မှုက တစ်ပြိုင်နက်တည်းပါလာမှာပါ။ ဒါကြောင့်မို့လို့ ဖွံ့ဖြိုးတိုးတက်ဖို့ဆိုတာ ငြိမ်းချမ်းရေးကို အခြေခံတာပါ။ မငြိမ်းချမ်းရင် ဖွံ့ဖြိုးရေးလုပ်ငန်း ဘယ်လောက် ပဲလုပ်လုပ် အဲဒီဒေသကို သွားလို့မရတာနဲ့ကို ဖွံ့ဖြိုးရေး လုပ်လို့မရဘူး"ဟု ၎င်းက ပြောသည်။ ထို့အပြင် ပေါ်ပေါက်လာမည့် လွှတ်တော်သုံးရပ်သည် အသက်ဝင်သည့် လွှတ်တော်ကြီးဖြစ်စေလို၍ ပြောဆိုဆွေး နွေးနိုင်မည့် ပညာတတ် ကိုယ်စားလှယ်လောင်းများဖြင့် ဝင်ပြိုင်ရန် ဖက်ဒရယ်ဒီမိုကရက်တစ်ပါတီမှ ပြင်ဆင်ထားသည်။ "ကျွန်တော်တို့ပါတီကတော့ လွှတ်တော်ကိုယ်စား လှယ်လောင်းအင်အား အများအပြားထည့်ပြီး ပြိုင်ထားတယ်။ ကျွန်တော်တို့ ဖက်ဒရယ် နိုင်ငံတော်ထူထောင်ရေး မျှော်မှန်းချက်နဲ့ ဝင်ပြိုင်တာဖြစ်တယ်။ လွှတ်တော်ထဲရောက်ရင်လည်း ပြောတတ်ဆိုတတ်၊ ပြောနိုင်ဆိုနိုင်တဲ့ လွှတ်တော် ကိုယ်စားလှယ်လောင်းတွေကို ထည့်ထားတယ်။ ပညာတတ်ရမယ်၊ ပြောနိုင်ဆိုနိုင်ရှိမယ့်သူတွေကို တင်ထားပါတယ်။လွှတ်တော်ကြီးကို အသက်သွင်းစေချင်တယ်။ဘာကြောင့်လဲဆိုရင် လွှတ်တော်ကြီးမှာ ပြောဆိုဆွေးနွေးတာမျိုးတွေ လိုလားပါတယ်။ ဒါကြောင့်မို့လို့ ပြောတတ်ဆိုတတ်၊ ပြောနိုင် ဆိုနိုင်၊ ပြောရဲဆိုရဲရှိတဲ့ ကိုယ်စားလှယ် လောင်းတွေကို အများဆုံး တင်ထားပေးတယ်"ဟု ဦးရန်နိုင်ဝင်းက ပြောသည်။
ပဲခူးတိုင်းဒေသကြီး အခြေစိုက်ပါ တီဖြစ်သည့် ဖက်ဒရယ်ဒီမိုကရက်တစ်ပါတီ သည် ၂၀၂၅ ခုနှစ် ဒီဇင်ဘာ ၂၈ ရက်တွင် စတင်ကျင်းပမည့် ပါတီစုံဒီမိုကရေစီ အထွေထွေ ရွေးကောက်ပွဲတွင် လွှတ်တော် ကိုယ်စားလှယ်ပေါင်း ၈၀ ကျော်ဖြင့် ဝင်ရောက်ယှဉ် ပြိုင်ရန် ပြင်ဆင်ထားသည်။ ညီသစ်
