၂၀၂၅ ၊ နိုဝင်ဘာ ၂၈
    ၂၀၂၅ ခုနှစ် ပါတီစုံဒီမိုကရေစီအထွေထွေရွေးကောက်ပွဲတွင် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (USDP) ကိုယ်စားပြု ဝင်ရောက်ယှဉ်ပြိုင်မည့် ကျိုင်းတုံမြို့နယ် လွှတ်တော်ကိုယ်စားလှယ် လောင်းများသည် မဲဆွယ်စည်းရုံးရေးကာလ ဒေသခံလူထုများနှင့်တွေ့ဆုံ၍ စည်းရုံးဟောပြောပွဲများ ပြုလုပ်လျက်ရှိသည်။ ယင်းအခြေအနေအပါအဝင် ဒေသခံလူထု၏ ရွေးကောက်ပွဲ၊ ဆန္ဒမဲပေးခြင်းစသည့် အမြင်သဘောထား၊ ၎င်းတို့၏ မျှော်လင့်ချက်၊ ဒေသခံတို့၏ လူမှုစီးပွားတို့နှင့်ပတ်သက်၍ ကျိုင်းတုံမြို့နယ် ပြည်နယ်လွှတ်တော်ကိုယ်စားလှယ်လောင်း (PR) ဒေါ်နန်းနော်အား တွေ့ဆုံမေးမြန်းထားပါသည်။

TREND ။        ။ ရွေးကောက်ပွဲဝင်ရတဲ့ အကြောင်းအရင်း အရင်ဆုံး ပြောပြပေးပါဦး။
DNN    ။    ။ ကိုယ်စားလှယ်လောင်းအဖြစ် ရွေးကောက်ပွဲဝင်အရွေးချယ်ခံရတာကတော့ ကိုယ့်‌ဒေသအကျိုးကို အဓိက ဆောင်ရွက်ပေးချင်လို့ ဖြစ်ပါတယ်။ ကျွန်မတို့ရဲ့ ဒေသမှာရှိတဲ့ စိုက်ပျိုးရေးကဏ္ဍ၊ လမ်းပန်းဆက်သွယ်ရေးကဏ္ဍနဲ့ လမ်း၊ တံတားစတဲ့ ဒေသအကျိုးတွေကို ဆောင်ရွက်ပေးချင်တာပါ။ လွှတ်တော်မှာ မိဘ ပြည်သူတွေကိုယ်စား ရောက်သွားပြီးတော့ မိဘပြည်သူ တွေရဲ့အသံကို လွှတ်တော် ထဲမှာ ရောက်စေချင်တယ်။ ပြည်သူတွေရဲ့ အသံတွေကို လွှတ်တော်ထဲမှာ ပြောပေးဖို့၊ ကိုယ့်ဒေသ ဖွံ့ဖြိုးတိုးတက်ဖို့ ဒါတွေကို အတတ်နိုင်ဆုံး ကိုယ်တိုင်ကိုယ်ကျ လုပ်ပေးချင်ပါတယ်။ အဲဒီလို လုပ်ပေးချင်တဲ့ စိတ်ရင်းစေတနာလည်း ရှိပါတယ်။ ဒါကြောင့်လည်း ရွေးကောက်ပွဲ ဝင်အ‌ရွေးချယ်ခံခဲ့တာပါ။

TREND ။        ။ ရွေးကောက်ပွဲဝင်တာ ပထမဦး ဆုံးလား။
DNN    ။    ။ အခုက ဒုတိယအကြိမ်ပါ။၂၀၂၀ ပြည့်နှစ်တုန်းက အမျိုးသားလွှတ်တော်နေရာမှာ ကျိုင်းတုံမြို့နယ်က ဝင်ပြိုင်ခဲ့ပါတယ်။ အခု ၂၀၂၅ မှာတော့ ဒုတိယအကြိမ် ဖြစ်ပါတယ်။ ကျွန်မက ကိုယ်စားလှယ်လောင်းမဖြစ်ခင် ကျိုင်းတုံဒေသမှာ  တောင်ပေါ်‌ဒေသရဲ့ ပညာရေးအပိုင်းရော၊ ဒေသဖွံ့ဖြိုးရေး၊ လမ်းပန်းဆက် သွယ်ရေးရော၊ လူမှုရေးအပိုင်းမှာရော တစိုက်မတ်မတ် လုပ်ခဲ့တဲ့သူ‌ ဖြစ်ပါတယ်။ 

TREND ။        ။ ရွေးကောက်ပွဲ အခင်းအကျင်း အပေါ်အမြင်နဲ့ ဘယ်လိုအပြောင်းအလဲ အရွေ့ဖြစ်နိုင်မလဲ သုံးသပ်ပေးပါဦး။
DNN    ။    ။ အခုက ဒီမိုကရေစီကို လိုချင်ကြတယ်။ အော်နေကြတယ်။ နိုင်ငံတော်အစိုးရက အခု ရွေးကောက်ပွဲ ကျင်းပပေးဖို့ ဆောင်ရွက်ပေးနေပြီ။ အဲဒီလို ဒီမိုကရေစီလိုချင်တယ်ဆိုရင် ရွေးကောက်ပွဲကနေတစ်ဆင့် သွားရမှာပါ။ ပြီးတော့ ဒီမိုကရေစီအတွက် ရွေးကောက်ပွဲကို ကျင်းပပေးတာ ဖြစ်ပါတယ်။ ပြီးတော့ ဒီ‌ရွေးကောက်ပွဲက ငါးနှစ်မှတစ်ကြိမ် လုပ်ခွင့်ရတာ။ ငါးနှစ်မှတစ်ကြိမ် လုပ်ခွင့်ရတဲ့အတွက် ရွေးကောက်ပွဲက အရေးကြီးသလို ပြည်သူလူထုကလည်း မဲပေးဖို့လိုတယ်။ ဘာကြောင့်လဲဆိုရင် လုပ်ပိုင် ခွင့်အာဏာဆိုတာ ပြည်သူလူထုလက်ထဲမှာ ရှိတယ်။ အဲဒီလို ပြည်သူလူထု လက်ထဲမှာ ရှိတာဖြစ်တဲ့အတွက် ပြည်သူလူထုက မဲရုံကို အရောက်သွားပြီး မဲပေးကြဖို့ လိုအပ်ပါတယ်။ မဲပေးမှ သာ ကျွန်မတို့ နိုင်ငံက အပြောင်းအလဲအရွေ့တစ်ခု ပေါ်ပေါက်လာမှာ ဖြစ်ပါတယ်။ အစိုးရတစ်ရပ် ပေါ်လာမယ်၊ လွှတ်တော်ပေါ် လာမယ်၊ ကောင်းတဲ့ အရွေ့ တစ်ခုဖြစ်သွားမယ်လို့လည်း ယုံကြည်ပါတယ်။ အပြောင်းအလဲဆိုတာက ကောင်းမွန်တဲ့ အပြောင်းအလဲပါပဲ။ အဓိကအချက်ကတော့ စီးပွားရေး ကောင်းမွန်လာမယ်။ စီးပွားရေး ပြောင်းပြီ၊ စီးပွားရေးကောင်းလာပြီဆိုရင် လူမှုရေး၊ ပညာရေး၊ ကျန်းမာရေး စတဲ့အခြားသော ကဏ္ဍတွေကလည်း တိုးတက်ကောင်းမွန်လာမှာ ဖြစ်ပါတယ်လို့ သုံးသပ်မိပါတယ်။ ကျွန်မ မဲဆွယ်စည်းရုံးရေး ဆင်းတဲ့အခါ လူထုကို အမြဲပြောပါတယ်။ ကျွန်မတို့က မဲဆန္ဒရှင်တွေဆီကို မဲလာတောင်းတာ ဖြစ်ပါတယ်။ အရင်တုန်းကဆိုရင် လွှတ်တော်ထဲ ရောက်သွားတော့ ကိုယ့်ဒေသအကျိုး၊ မဲဆန္ဒရှင်တွေရဲ့ အကျိုးကို ထဲထဲဝင်ဝင် မလုပ်ကြတာမျိုးတွေ တွေ့ခဲ့ဖူးတယ်။ အဲဒီလိုမျိုး အားမလို အားမရတာမျိုးတွေ ဖြစ်ခဲ့ဖူးတယ်။ ဒါကြောင့်လည်း မဲပေးတဲ့အခါ လူရွေးမမှားဖို့ ဒေသခံပြည်သူတွေကို ပြောပြပါတယ်။ ကျွန်မကတော့ ရွေးကောက်ပွဲအလွန် ကျွန်မတို့နိုင်ငံက ပိုပြီးတော့ ကောင်းလာမယ်လို့ ထင်တယ်။ လက်ရှိမှာလည်း နိုင်ငံတော် အကြီးအကဲတွေက တိုင်းပြည်ကောင်းအောင် လုပ်နေပါတယ်။ ရွေး ကောက်ပွဲအပြီး ရွေးကောက်ပွဲအလွန်မှာလည်း တိုင်းပြည်ရဲ့ အပြောင်းအလဲဟာ အခုလက်ရှိအခြေအနေတွေထက် အများကြီး တိုးတက်ကောင်းမွန် လာမယ်လို့ ယုံကြည် မျှော်လင့်ပါတယ်။

TREND ။        ။ လက်ရှိ ဒေသခံလူထုရဲ့ လူမှုစီး ပွားဘ၀ အခြေအနေတွေနဲ့ပတ်သက်ပြီး ပြောပြပါဦး။
DNN    ။    ။ အခုကျွန်မတို့ စည်းရုံးရေးဆင်းတဲ့ အချိန်မှာ စပါးတွေက ပုံနေတာ တွေ့နေရတယ်။ စပါး ဈေးနှုန်းတွေကလည်း အရင်တုန်းကဆိုရင် ကီလို ၄၀ တစ်အိတ်‌ဆိုရင် ငါးသောင်းလောက် ရှိခဲ့တယ်။ အခု ကီလို ၄၀ တစ်အိတ်ကို သုံး‌သောင်းဝန်းကျင်လောက်ပဲ သူတို့ ရောင်းလို့ရတယ်။ ကားလမ်းမပေါက်တဲ့ ရွာတွေ ဆိုရင် လာဝယ်တဲ့သူတောင် မရှိဘူး။ အဲဒီလိုအခြေအနေတွေကို တောင်သူလယ်သမားတွေ ကြုံနေရတယ်။ အဲဒီလို တောင်သူလယ်သမားတွေရဲ့ အခက်အခဲတွေကို တွေ့မိတော့ သနားလည်း သနားမိပါတယ်။ အဲဒီလို လမ်းမပေါက်တဲ့နေရာတွေဆိုရင် သူများကို ထမ်းခိုင်းရတယ်၊ ရိတ်သိမ်းပြီး အိမ်အရောက် တစ်အိတ်ကို ၇၀၀၀ လောက် ကုန်ကျစရိတ် ရှိတာပေါ့။ ရိတ်သိမ်း စရိတ်ကလည်း မနည်းဘူး ကုန်ကြတယ်။ စက်ယန္တရား ကြီးတွေနဲ့ ရိတ်ရတာဆိုပေမယ့် သူတို့က ငှားကြရတာ။ တစ်နာရီကို လေးသောင်းတောင် မကဘူးထင်တယ်၊ သောင်းဂဏန်းပေါ့။ စက်ယန္တရား မရောက်တဲ့နေရာ တွေမှာ လူငှားပြီး ရိတ်ရတာ။ တချို့ဆိုရင် ရှုံးတယ်၊ အရင်းတောင် မရဘူးလို့ သိရတယ်။ စပါးစိုက်ပေမယ့် ဈေးနှုန်းကမရဘူး။ ဒါပေမဲ့ အစားအသောက်တွေ ဝယ်ရတာကျတော့ ဈေးများများနဲ့ ပေးဝယ်ရတယ်ပေါ့။ အဲဒီလို အခက်အခဲတွေ ရှိနေတယ်‌ဆိုတာ တွေ့နေရတယ်။ အဲဒီလို တောင်သူလယ်သမား တွေရှိမယ်။ နောက် လမ်းတံတားတွေ၊ တာချီလိတ်ဘက် သွားတဲ့လမ်းဆိုရင် ချောင်း‌တွေရှိတယ်။ ရွာကနေ လယ်သွားဖို့နေရာမှာ အခုက ဝါးတွေနဲ့ပဲ တံတား လုပ်ထားကြတာ။ ရေများပြီဆိုရင် အဲဒီတံတားတွေက ရေထဲပါသွားတယ်။ တစ်နှစ်ကို နှစ်ကြိမ်၊ သုံးကြိမ်လောက်ကို ဝါးတံတားတွေ လုပ်ရတယ်။ အဲဒီလိုမ လုပ်ရင် လယ်တွေဆီကို သွားလို့မရဘူး။ အဲဒီလို အခက်အခဲတွေ ရှိနေကြတယ်။ သူတို့က ကြိုးတံတားတွေ လုပ်ပေးဖို့ တောင်းဆိုကြတာတွေ လည်းများတယ်။ အဲဒီလို သူတို့ရဲ့ လိုအပ်ချက်တွေကိုလည်း လုပ်ပေးချင်ပါတယ်။ အဲဒီလို သူတို့ရဲ့လိုအပ်ချက်တွေကို ထမ်းဆောင်ပေးချင်တဲ့အတွက်လည်း ကျွန်မအ နေနဲ့  ရွေးကောက်ပွဲဝင်ဖို့ ဆုံးဖြတ်ခဲ့တာပါ။

TREND ။        ။ ရွေးကောက်ပွဲနဲ့ ပတ်သက်ပြီး ဒေသခံတွေရဲ့သဘောထား၊ သူတို့ရဲ့ မျှော်လင့်ချက်က ဘာတွေဖြစ်မလဲ။
DNN    ။    ။ ရွေးကောက်ပွဲနဲ့ ပတ်သက်ပြီးတော့ မဲပေးဖို့ အားကျိုးမာန်တက် ရှိနေကြပါတယ်။ ရွေးကောက်ပွဲပြီးသွားရင် စီးပွားရေးတွေ ကောင်းအောင်၊ ကုန်စည်စီးဆင်းမှုတွေ မြန်ဆန်လွယ်ကူအောင် အဲဒါမျိုး မျှော်လင့်ကြတယ်။ အဓိကကတော့ စီးပွားရေးကောင်းဖို့ နံပါတ်(၁) မျှော်လင့်ကြတယ်။ စီးပွား ရေးကောင်းပြီဆိုရင် ကျန်တဲ့ကဏ္ဍ‌တွေ ချိတ်ဆက်ပြီး ကောင်းသွားပြီပေါ့။ ပညာရေး၊ ကျန်းမာရေး၊ လူမှုရေးအားလုံးက လိုက်ပါလာမှာလေ။ နံပါတ်(၁) ကတော့ စီးပွားရေးပဲ။ အဲဒါဆိုရင် မိဘပြည်သူ တွေအနေနဲ့ မဲပေးကြဖို့ တိုက်တွန်းပြောကြားခဲ့ပါတယ်။ မဲပေးတာကို မပျင်းဖို့၊ ငါးနှစ်တစ် ကြိမ်ရတဲ့ ကိုယ့်အခွင့်အရေးကို လက်လွှတ် မဆုံးရှုံးဖို့၊ အလုပ်အကိုင် ဘာပဲရှိရှိ၊ အဲဒီအလုပ်ကို ထားခဲ့ပြီးတော့ အချိန်ပေးပြီး မဲသွားပေးကြဖို့လည်း စည်းရုံးပြောဆိုခဲ့ပါတယ်။ အလုပ်ဆိုတာက နေ့တိုင်း လုပ်နေရတယ်၊ လတိုင်း လုပ်နေရမယ်၊ နှစ်တိုင်း လုပ်နေရမယ်။ မဲပေးတာ ကကျတော့ ငါးနှစ်မှတစ်ကြိမ် ရှိတာမို့ မဲပေးဖို့၊ မဲပေးတဲ့ အခါမှာလည်း ကိုယ့်ဒေသအကျိုး၊ ကိုယ့်မြို့နယ် ဖွံ့ဖြိုးတိုးတက်ရေး အမှန်တကယ် ဖော်ဆောင် ပေးမယ့်သူမျိုးကိုလည်း ရွေးချယ်ကြဖို့၊ မဲပေးမမှားဖို့ သူတို့ကို တိုက်တွန်း ပြောကြားပေးနေပါတယ်။

TREND ။        ။ ကျိုင်းတုံ‌ဒေသရဲ့ အဓိက လိုအပ်ချက်က ဘာတွေဖြစ်မလဲ၊‌ လူထုနဲ့တွေ့ဆုံပွဲ‌တွေမှာ သူတို့က ဘာတွေ တင်ပြတောင်းဆိုကြလဲ။
DNN    ။    ။ ကျွန်မတို့ ကွင်းဆင်းတဲ့အခါမှာ ဒေသခံပြည်သူလူထုတွေက ဘာတွေ အခက်အခဲရှိလဲဆိုရင် အဓိကကတော့ စီးပွားရေးကောင်းမွန်အောင် လုပ်ပေးစေချင်တယ်။ လမ်း၊ တံတား ပြီးတော့ ဆန်စပါး ဈေးနှုန်းတွေရအောင် ကူညီပြီးတော့ ဆောင်ရွက်ပေးစေလိုတယ်။ တော်တော်များများက လမ်းတွေ ကောင်းအောင်လုပ်ပေးဖို့ လမ်းနဲ့တံတား လိုအပ်ချက်တွေ တင်ပြကြပါတယ်။ သူတို့က ကျွန်မတို့ကို တော်တော်အားကိုးပါတယ်။ ကျွန်မတို့သွားရင် လှိုက်လှိုက်လှဲလှဲ ကြိုဆိုကြတယ်။ တချို့က အားကိုးတ ကြီးနဲ့ သူတို့ရဲ့ လိုလားချက်တွေကို ပြောလာတာတွေရှိတယ်။ လမ်းတွေလိုတဲ့ သူတွေဆိုရင် "ဆရာမ ကျွန်တော်တို့ရွာမှာဆိုရင် လမ်းတွေလိုနေတယ်။ ဒီလိုအခက်အခဲတွေရှိတယ်၊ ကျွန် တော်တို့က အားကိုးပါတယ်။ ရွေးကောက်ပွဲမှာ မဲထည့်ကြမယ်"လို့ ပြောကြတယ်။ ပြီးရင်တော့ ဒါတွေ ဆောင်ရွက်ပေးဖို့ ပြောတာပေါ့။ 

TREND ။        ။ လွှတ်တော်ထဲ ရောက်သွားပြီဆိုရင် ဒေသနဲ့ ဒေသခံ မဲဆန္ဒရှင်ပြည်သူတွေအကျိုး ဘယ်လို ဆောင်ရွက်ပေးသွားဖို့ရှိလဲ။
DNN    ။    ။ တကယ်လို့ ကျွန်မတို့ လွှတ်တော်ထဲ ရောက်သွားမယ်ဆိုရင် ပြည်သူလူထုရဲ့ အသံကို လွှတ်တော်ထဲရောက်အောင် ယူဆောင်ပြီးတော့‌ ဆွေးနွေးသွားမှာပါ။ သူတို့ရဲ့လိုလားချက်တွေ၊ အခက်အခဲတွေကို လွှတ်တော်မှာ တင်ပြသွားမှာပါ။ ကျွန်မတို့ ကျိုင်းတုံ‌ဒေသမှာဆိုရင် လမ်းပန်းဆက်သွယ်ရေး၊ စီးပွားရေး၊ ပညာရေး၊ ကျန်းမာရေး အလုံးစုံကဏ္ဍ‌တွေနဲ့ ပတ်သက်ပြီး ဖွံ့ဖြိုးတိုးတက်အောင် ကျွန်မရဲ့ ကိုယ်စွမ်း၊ ဉာဏ်စွမ်းရှိသမျှ အတတ်နိုင်ဆုံး ကြိုးပမ်းဆောင်ရွက်ပေးသွားမှာပါ။ ကျွန်မတို့ရဲ့ ရှမ်းပြည်နယ် အရှေ့ပိုင်းမှာက လမ်းပန်းဆက်သွယ်ရေး အခက်အခဲရှိတယ်၊ ပညာရေးပိုင်းမှာလည်း အားနည်းချက်တွေရှိတယ်။ ပညာရေးအပိုင်းမှာ ဆိုရင်လည်း တောင်ပေါ်ဒေသ၊ မြေပြန့်မရွေး လူတိုင်း အတန်းပညာ တတ်မြောက်အောင်၊ လူတိုင်းပညာသင်ကြားနိုင်အောင် ကူညီပြီးတော့ ဆောင်ရွက်ပေးသွားမှာပါ။

TREND ။        ။ ကျိုင်းတုံက တိုင်းရင်းသားပေါင်းစုံ နေထိုင်ကြတယ်။ တည်တည်ငြိမ်ငြိမ် အေးအေးချမ်းချမ်းရှိနေတာ တွေ့ရတယ်။ ဒီအပေါ်မှာ ဘယ်လိုမှတ် ချက်ပြုချင်လဲ။
DNN    ။    ။ ကျိုင်းတုံမှာရှိတဲ့သူတွေက စည်းလုံးကြတယ်။ ပြီးတော့ ဂိတ်တွေကလည်း ပတ်ပတ်လည်မှာ ရှိနေတယ်။ အဲဒီအချက်ကြောင့်လည်း ပါပါတယ်။ အဓိကကတော့ ကျိုင်းတုံက လူတွေက အေးအေးချမ်းချမ်းပဲ နေချင်ကြတာ။ စစ်ဖြစ်တာတို့၊ ပဋိပက္ခ‌ဖြစ်တာတို့ မလိုလားကြဘူး။ ကျွန်မက အမြဲပြောဖြစ်တာ တို့ကျိုင်းတုံကလူတွေ လိမ္မာကြတယ်။ ဒါကြောင့် ကျိုင်းတုံက အေးချမ်းတာပါလို့။ မီးဆိုရင်လည်း ၂၄ နာရီ ရတယ်။ ပြီးတော့ ဘာသာရေးလည်း ကိုင်းရှိုင်းကြတယ်။ အလှူအတန်းလည်း တော်တော်လေး လုပ်ကြပါတယ်။ တိုင်းရင်းသားပေါင်းစုံ နေကြတယ်၊ အားလုံးစည်းစည်း လုံးလုံးပါပဲ။ ဒီမှာက တိုင်းရင်းသားတွေရဲ့ ယဉ်ကျေးမှု ပေါင်းစုံရှိတယ်။ ရှမ်းဆိုရင် ရှမ်းကြီး၊ တိုင်းလျန်၊ အာခါ၊ လွယ်၊ လားဟူ၊ ပလောင် ၊ 'ဝ'၊ လီဆူး စသည်ဖြင့် ယဉ် ကျေးမှုအဖွဲ့‌တွေ ၁၂ မျိုးလောက်ရှိတယ်။ ဘာပွဲရှိရှိ တစ် ဖွဲ့နဲ့တစ်ဖွဲ့ ဖိတ်ကြတယ်။ ဆုံကြတယ်။ ဥပမာ အာခါတို့၊ လားဟူတို့ နှစ်သစ်ကူးဆိုရင် ကျန်တဲ့ တိုင်းရင်းသားပေါင်းစုံ အားလုံးကို ဖိတ်တယ်။ ရှမ်းနှစ်သစ်ကူးပွဲတော် ဆိုရင်လည်း တိုင်းရင်းသားပေါင်းစုံပဲ လာကကြတာ။ သူတို့ပွဲ‌ဆိုရင် ကိုယ်တွေသွားကတယ်။ ကိုယ့်ပွဲဆိုရင် သူတို့ လာကတယ်။ အဲဒီလို တိုင်းရင်းသားပေါင်းစုံ ငြိမ်းချမ်းစွာ တူယှဉ်တွဲ နေထိုင်ကြတယ်။ ကျွန်မတို့ ကျိုင်းတုံက  တခြား‌ကိစ္စတွေ စိတ်မဝင်စားဘူး၊ အေး‌အေးချမ်းချမ်းပဲ နေချင်ကြတယ်၊ လိမ္မာကြတယ်၊ ဒါကြောင့်ငြိမ်းချမ်းတာ။
ရွေးကောက်ပွဲကို ဆန့်ကျင်တယ် ဆိုတာကလည်း အနည်းအကျဉ်းတော့ ရှိကောင်း ရှိနိုင်ပါတယ်။ ဒါပေမဲ့ ရာခိုင်နှုန်း နည်းပါတယ်။  အဓိကက တော့ ဒီကလူ‌တွေ တည်ငြိမ်အေးချမ်းဖို့၊ စီးပွားရေး ပိုကောင်းလာဖို့ မျှော်လင့်နေကြတာပါ။

TREND ။        ။ ပြည်ခိုင်ဖြိုးပါတီ အစိုးရဖွဲ့နိုင်ခဲ့ပြီဆိုရင် ဒေသအတွက် ဘာတွေလုပ်ပေးမှာလဲ။ ဘယ်လို အပြောင်းအလဲတွေ ဖော်ဆောင်ပေးမလဲ။
DNN    ။    ။ ကျွန်မတို့ပါတီက  အသင်းဘဝကတည်းက ဒေသဖွံ့ဖြိုးရေး‌လုပ်ငန်းတွေကို အမြဲတမ်း လုပ်ဆောင်ခဲ့တဲ့ ပါတီဖြစ်တဲ့အတွက် ရှမ်းပြည်နယ် (အရှေ့ပိုင်း)မှာ လူထုရဲ့ ထောက်ခံယုံကြည်အားပေးမှုက အားကောင်းတဲ့ပါတီ ဖြစ်ပါတယ်။ ကျွန်မတို့ပါတီက ပါတီကြီးလည်း ဖြစ်တဲ့အတွက် ပြည်ထောင်စု အဆင့်ရော၊ ရှမ်းပြည်နယ်အဆင့်မှာရော အစိုးရ ဖွဲ့နိုင်မယ်လို့ ယုံကြည်ပါတယ်။ တကယ်လို့ အစိုးရဖွဲ့နိုင် ခဲ့မယ်ဆိုရင် မိဘပြည်သူတွေရဲ့ အခက်အခဲတွေ အပါအဝင် စီးပွားရေးကောင်းမွန်အောင်၊ လမ်းပန်းဆက်သွယ်ရေးကောင်းအောင်၊ လူမှုရေး၊ စီးပွားရေး၊ ပညာ ရေးတွေ ပိုပြီးတိုးတက်ဖွံ့ဖြိုးအောင်၊ ကျိုင်းတုံ‌ဒေသ ပိုမို ဖွံ့ဖြိုးတိုးတက်အောင် လုပ်ဆောင်ပေးနိုင်မယ်လို့ ယုံကြည်ပါတယ်။

TREND    ။    ။ အခုလို ဖြေကြားပေးတဲ့အတွက် ကျေးဇူးတင်ပါတယ်။
ညီသစ်
             
(TREND News ဂျာနယ်အတွဲ(၄)၊ အမှတ်( ၄၅ ) တွင်ပါရှိသော အင်တာဗျူးအား တဆင့်ပြန်လည်မျှဝေခြင်းဖြစ်ပါသည်။ )

TREND News Journal PDF File Download Link