၂၀၂၅ ၊ နိုဝင်ဘာ ၂၇

    ဥပဒေအရ ဖျက်သိမ်းခံရသည့် NDF ပါတီ၏ အထွေထွေအတွင်းရေးမှူးအဖြစ် ဆောင်ရွက်ခဲ့ပြီး ၂၀၂၅ ခုနှစ် ပါတီစုံအထွေထွေရွေးကောက်ပွဲတွင် တစ်သီးပုဂ္ဂလ လွှတ်တော်ကိုယ်စားလှယ်လောင်းအဖြစ် ဒေါပုံမြို့နယ် ပြည်သူ့လွှတ်တော်ကိုယ်စားလှယ်လောင်းနေရာအတွက် ဝင်ရောက်ယှဉ်ပြိုင်မည့် ဦးကျော်ထက်နှင့် တွေ့ဆုံမေးမြန်းမှုများကို ဖော်ပြလိုက်ပါသည်။

TREND    ။         ။ ပထမဆုံး မေးချင်တာကတော့ ဦးကျော်ထက်ရဲ့ နိုင်ငံရေးဖြတ်သန်းမှုကို သိပါရစေ။
UKH    ။        ။ ကျွန်တော်က လူငယ်ဘဝလောက်ကတည်းက နိုင်ငံရေးစာပေတွေကို ဖတ်ရတာဝါသနာပါတယ်။ ဒါပေမဲ့ နိုင်ငံရေးအရ အခြားသော လှုပ်ရှားမှု တွေမရှိခဲ့ဘူး။ နောက် ကျွန်တော် ကျောင်းတွေပြီးတော့ စက်ရုံတစ်ခုမှာ အလုပ်ဝင်တယ်။ စက်ရုံတွေမှာ အလုပ်ဝင်ပြီး ၂၀၀၆ ခုနှစ်မှာ လှိုင်သာယာစက်မှုဇုန်ထဲမှာရှိတဲ့ ကျွန်တော်တို့ရဲ့ စက်ရုံမှာ အလုပ်သမားတွေရဲ့ နစ်နာမှု လေးတွေရှိခဲ့တယ်။ အလုပ်သမားအခွင့် အရေးပေးဖို့ ကုမ္ပဏီရဲ့ လိုအပ်ချက်လေးတွေ ရှိခဲ့တယ်။ ဒါတွေနဲ့ပတ်သက်ပြီး ဦးဆောင်ပြီး လိုအပ်ချက်တွေ တောင်းဆိုရာကနေ ဆန္ဒပြပွဲလို ဖြစ်သွားခဲ့တယ်။ ဒီလိုတောင်းဆိုမှုကနေ အလုပ်သမားတွေအပေါ် ကုမ္ပဏီက ပြန်ပြီးတော့ နစ်နာမှုတွေ ဖြည့်ဆည်းပေးခဲ့တယ်။ ၂၀၀၆မှာ ကျွန် တော်တို့ စက်ရုံကစပြီး အလုပ်သမားတွေရဲ့ နစ်နာမှုအခွင့်အရေးတွေကို တောင်းဆိုလို့ရတာကနေစပြီး ကျန်စက်ရုံတွေကလည်း လုပ်သားထုနစ် နာမှုတွေ တောင်းဆိုရဲလာကြပြီး တောင်းဆိုလာကြတယ်။ ဒါက လုပ်သားထုအုံကြွအောင် လုပ်ခဲ့တာမဟုတ်ပါဘူး။ တကယ်လုပ်သားတွေ နစ်နာမှုကို တောင်းဆိုခဲ့ကြတာ ပါ။ တကယ်လည်း လုပ်သားတွေနစ်နာလို့ အလုပ်သမားဝန်ကြီးဌာနက လာရောက် ဖြေရှင်းပေးခဲ့ပါတယ်။ ဒါက အလုပ်သမားအရေးကို ဦးဆောင်ခဲ့တဲ့အပိုင်းပါ။ နောက်ပိုင်းမှာ ကျွန်တော်ပြည်ပနိုင်ငံက ရေနံစင်တွေမှာ သွားရောက်လုပ်ကိုင်ခဲ့ပြီး ၂၀၁၀ ရောက်တော့ NDF ပါတီရဲ့မူဝါဒကို လက်ခံပြီး ပါတီဝင် တယ်။ ဒေါပုံမြို့နယ်ရဲ့ အတွင်းရေးမှူးအနေနဲ့ စပါလာတယ်။ နောက် ဆင့်ကဲဆင့်ကဲနဲ့ တိုင်းကော်မတီဝင်၊ အတွင်းရေးမှူး၊ ရန်ကုန်တိုင်းဥက္ကဋ္ဌဖြစ်တယ်။ အဲ့ဒီကနေပြီးတော့ ကျွန်တော် ဗဟိုလူငယ်ခေါင်း ဆောင်၊ CEC ပြီးတော့ အထွေထွေအတွင်းရေးမှူးအဖြစ် ၂၀၂၅ စက်တင်ဘာ ၉ ရက် ဥပဒေအရ ပါတီ ဖျက်သိမ်းခဲ့ရတဲ့အထိ တာဝန်ထမ်းဆောင်ခဲ့ပါတယ်။

TREND    ။         ။ ဦးကျော်ထက် အထွေထွေအတွင်းရေးမှူးတာဝန် ထမ်းဆောင်ခဲ့တဲ့ပါတီက ဥပဒေအရ ဖျက်သိမ်းခဲ့ပြီးတဲ့နောက် ချက်ချင်းဆိုသလိုပဲ ကျင်းပတဲ့ရွေးကောက်ပွဲမှာ တစ်သီးပုဂ္ဂလ လွှတ်တော်ကိုယ်စားလှယ် လောင်းအဖြစ် ဝင်ရောက်ယှဉ် ပြိုင်ဖို့ ဘယ်လိုစီစဉ်ဖြစ်ခဲ့လဲဗျ။
UKH     ။        ။ ကျွန်တော့်ရဲ့ နိုင်ငံရေးရည်မှန်းချက်ကတော့ ၂၀၁၅ တုန်းကလည်း အမျိုးသား ဒီမိုကရေစီအင်အားစုပါတီကို ကိုယ်စားပြုပြီးတော့ ရွေးကောက်ပွဲ ဝင်ရောက်ယှဉ်ပြိုင်ခဲ့ပါတယ်။ ဒီနိုင်ငံရေးအရွေ့တွေကို ကျွန်တော်တို့ရဲ့ အသက်အရွယ်အပိုင်း အခြားအရဆိုရင် လတ်ဆတ်တဲ့ လူငယ်ဖြစ် တယ်ပေါ့။ ဒီလိုမျိုးပါဝင်မှ လူငယ်တွေ ကြုံတွေ့ရမှာ နှစ်မျိုးနှစ်စား ရှိတယ်ပေါ့။ တစ်ချက်က နိုင်ငံရေး အရွေ့တွေကို ကိုယ်တိုင်တွန်းခွင့်ရတယ်။ နောက်တစ်ချက်က ကိုယ်တိုင်လေ့လာ ခွင့်ရတယ်။ ဒီလိုအပြောင်းအလဲတွေကနေ လေ့လာသင်ယူခွင့်ရထားခြင်းအားဖြင့် အနာဂတ်နိုင်ငံတော်တည် ဆောက်ရေးမှာ ကျွန်တော်တို့က ထဲထဲဝင်ဝင်ပါဝင်နိုင်လိမ့်မယ်လို့ ကျွန်တော်တို့က မျှော်လင့်တယ်။ ၂၀၂၀ မှာတော့ ပြည်ပမှာ ကိုဗစ်နဲ့ပိတ်မိပြီး ရွေးကောက်ပွဲနဲ့လွဲ ချော်ခဲ့တယ်။ ၂၀၂၅ မှာတော့ ပါတီကို ကိုယ်စားပြုပြီး ဝင်ပြိုင်ဖို့ စဉ်းစားထားတယ်။ နိုင်ငံရေးအရွေ့ကို ပါတီတစ်ရပ်အနေနဲ့ တွန်းဖို့စဉ်းစားတာပေါ့လေ။ ပြောရမယ်ဆိုရင်တော့ ဆုံးရှုံးသွားတဲ့ နိုင်ငံရေးအပြောင်းအလဲကို အစပြန်ပြုရမှာ။ စိန်ခေါ်ချက်တွေကြားမှာ ပေါလေ။ ဒီလို  ပဋိပက္ခတွေ ရှိနေတဲ့အချိန်မှာ နိုင်ငံရေးသမားဆိုသူတွေက  အပြောင်းအလဲမှာ ပိုပြီးတော့ ပါဝင်သင့်တယ်လို့ မြင်တယ်။ ဘာကြောင့်လည်းဆိုတော့ ဒီလိုပါဝင်မှသာ လျှင် အခက်အခဲတွေကြားထဲက ပါဝင်ရှင်သန်နိုင်တဲ့သူမှ သာလျှင်ပိုပြီး နိုင်ငံရေးကို သိမှာပါ။ ပိုပြီးလုပ်တတ်ကိုင် တတ်မှာပါ။ ပြောရရင် ခြေခင်းလက်ခင်းသာတဲ့အချိန်မှာ နိုင်ငံရေးအရ နိုင်မယ်မှန်းသိလို့ နိုင်ခြေရှိတဲ့ ပါတီထဲဝင် ပြိုင်တာဟာ နိုင်ငံရေး မဟုတ်ဘူး။ လှေကြုံစီးတယ်လို့ မြင်တယ်။ ခုလို အခက်အခဲ ရှိနေတဲ့အချိန်မှာ ဝင်ပြိုင် တယ်။ အခက်အခဲကြားမှာ ကြိုးစားရတာဖြစ်တဲ့အတွက် ဒီရွေးကောက်ပွဲမှာ မဖြစ်မနေပါရမယ်လို့ ဆုံးဖြတ်ထားတာဖြစ်တဲ့အတွက် ပါတီဖျက်ခံလိုက်ရသော်လည်း လွှတ် တော်နိုင်ငံရေးကို ပြန်သွားမယ့်အချိန်မှာ ပါဝင် သင့်တယ်လို့ယူဆပြီး တစ်သီးပုဂ္ဂလအနေနဲ့ ဝင်ပြိုင်မယ်ဆိုပြီး ဆုံးဖြတ်ချက်ချလိုက်တာပါ။

TREND    ။         ။ တစ်သီးပုဂ္ဂလ လွှတ်တော်ကိုယ်စားလှယ် လောင်းတွေရဲ့ မဲဆွယ်ကာလမှာ ဘယ်လိုအခက်အခဲတွေရှိနေသလဲဗျ။
UKH     ။        ။ တစ်သီးပုဂ္ဂလဆိုတာကတော့ ပါတီတစ်ရပ်လိုမျိုး မူဝါဒတွေချပြီးတော့ အဖွဲ့အစည်းနဲ့ တစ်မြို့နယ်ကလုပ်တာကို တစ်မြို့နယ်က လာကူတာ။ ဗဟိုကနေ စီမံခန့်ခွဲပေးတာ။ ငွေရေးကြေးရေးအရ ဗဟိုကနေ အထောက်အပံ့ပေးတာမျိုးတွေ ပါတီမှာဆိုရင်တော့ ရှိတာပေါ့လေ။ တစ်သီးပုဂ္ဂလကျတော့ ငွေရေးကြေးရေးပိုင်း၊ လုပ်ငန်းဆောင်တာပိုင်းတွေ ကိုယ်တိုင် ဆောင်ရွက်ရတာ။ ဒီတော့ လုပ်ကိုင်ဆောင်ရွက်ရမှာ စိန်ခေါ်ချက်လေးတွေတော့ ရှိတာ။ ပါတီ ကိုယ်စားလှယ် လောင်းတွေကတော့ ကိုယ်စားဆိုတာရှိတယ်။ ကိုယ်စားလှယ်ရဲ့ ကိုယ်စားလှယ်ဆိုတာမျိုးနဲ့ လွှတ်ထားလို့ ရတယ်။ မြို့နယ်စည်းရုံးရေးကော်မတီက ကိုယ်စားလှယ် လောင်းတွေရဲ့အလုပ်ကို ဝိုင်းဝန်းကူညီလို့ ရတယ်။ ကျွန်တော် တို့ကြတော့ မြို့နယ်စည်းတွေဘာတွေ ဖွဲ့မရတော့ တစ်သီးပုဂ္ဂလအတွက် အားနည်းချက်တော့ရှိတာ ပေါ့လေ။ ယှဉ်ပြိုင်တဲ့အခါမှာလည်း ပါတီပုံရိပ်ရှိတဲ့ ကိုယ်စားလှယ်လောင်းတွေကတော့ အားသာချက် ရှိတာ ပေါ့လေ။

TREND    ။         ။ ရွေးကောက်ပွဲကျင်းပဖို့သိပ်မလို တော့တဲ့အချိန်မှာ နိုင်ငံရဲ့ အပြောင်းအလဲကို မလိုလား ကြသူတွေက အတု အယောင်ရွေးကောက်ပွဲလို့ ပုံဖျက်နေကြတာရှိသလို နိုင်ငံအချို့ကလည်း ရွေးကောက်ပွဲအပေါ် ဝေဖန်နေကြတာတွေ ရှိတယ်။ ဒီအအပေါ်မှာ ရွေးကောက်ပွဲဝင် ကိုယ်စားလှယ် လောင်းတစ်ယောက်အနေနဲ့ ဘာများပြောချင်ပါသလဲ။
UKH     ။        ။ နိုင်ငံရဲ့အပြောင်းအလဲတစ်ရပ်ကို လိုလားသူနဲ့ မလိုလားသူဆိုတာ ရှိတယ်ပေါ့ ဗျာ။ ရွေးကောက်ပွဲဆိုတာ နိုင်ငံရေးအရ အရွေ့တစ်ခုဖြစ်တယ်။ကျွန်တော်တို့အားလုံးက နိုင်ငံရေးအရ ဘာမှခိုင်ခိုင်မာ မာမရှိတဲ့ အခြေအနေတစ်ရပ်မှာ နေမလား။ ရွေးကောက်ပွဲဆိုတဲ့ အရွေ့တစ်ခု၊ အပြောင်း အလဲတစ်ခုဖြစ် လာတဲ့အပေါ်မှာ ပါဝင်မလားဆိုတာ စဉ်းစားရမယ်။ ပါ ဝင်ဖို့အတွက်ကို ကန့်ကွက်နေ ခြင်းဟာ နိုင်ငံအတွက် အမြတ်မဖြစ်ဘူး။ ပြောရရင် ရွေးကောက်ပွဲကို ကဖျက်ယဖျက် လုပ်နေခြင်းက နိုင်ငံတော်နဲ့ပြည်သူကို ရှုံးနိမ့်စေချင်တဲ့ လုပ်ရပ်တွေပဲ ဖြစ်တယ်။ ရွေးကောက်ပွဲကနေ အခြားအပြောင်းအလဲတွေကို ဖြည်းဖြည်းချင်း ဆောင်ရွက်ရမယ်။ နိုင်ငံရေးအပြောင်းအလဲကနေ နိုင်ငံတော် ဖွံ့ဖြိုးတိုးတက်ရေးကိစ္စတွေကလည်း ကျွဲကူးရေပါ ဆိုသလို ဖြစ်လာမှာဖြစ်တယ်။ နိုင်ငံအချို့က ပြောနေတာကလည်း သူတို့ရဲ့ အကျိုးစီးပွားနဲ့ နွှယ်နေတဲ့အတွက် သူတို့ပြောနေတဲ့ အရာတွေကလည်း သူတို့အ ကျိုးစီးပွားအတွက် ကိုင်စွဲပြီး ပြောနေကြတာပဲ ဖြစ်ပါတယ်။ မြန်မာနိုင်ငံရဲ့ အကျိုးစီးပွားနဲ့ယှဉ်ပြီးပြောတာ မရှိသလောက် နည်းပါတယ်။ အရင်ရွေးကောက်ပွဲတွေ အပြောင်းအလဲ အစပိုင်းတွေမှာလည်း ခုလို လက်မခံဘူး ပြောခဲ့ကြတာပဲလေ။ တကယ်တမ်း အရပ်သားအစိုးရ ပေါ်ထွက်လာချိန်မှာလည်း သူတို့ ဆီက ဘာအကူအညီမှ မရခဲ့ပါဘူး။ မြန်မာနိုင်ငံသူနိုင်ငံသားတွေရဲ့ ကောင်းစားရေးကို ဝေဖန်ခဲ့ကြပြီး ကန့်ကွက်ကြတဲ့ နိုင်ငံတွေ ကူညီတာ မရှိပါဘူး။ ယှဉ်ပြောရရင် ကမ္ဘာပေါ်မှာ စနစ်မျိုးစုံနဲ့ အုပ်ချုပ်နေတဲ့ နိုင်ငံတွေအများကြီးပဲ။ သူတို့အကျိုးစီးပွားတည်မြဲတဲ့ နိုင်ငံဆိုရင် အရေးယူပိတ်ဆို့တာ မရှိဘူး။ သူတို့ အကျိုးစီးပွားအရ အနိုင်ကျင့်လို့ရမယ့် နိုင်ငံဆိုရင် နည်းမျိုးစုံနဲ့ ဝင်ရောက်ခြယ်လှယ်ပြီး ပိတ်ဆို့မှုတွေ လုပ်တတ်တယ်ဆိုတာ နိုင်ငံရေးအရ သိရမယ့်ကိစ္စပါ။ ဒါကြောင့် ပြည်သူတွေအနေနဲ့ ကိုယ့်အမျိုးသား အကျိုးစီးပွားကို သိဖို့လိုတယ်။ ကိုယ့်နိုင်ငံတွင်းက ပဋိပက္ခကို ကိုယ်တိုင် ဖြေရှင်းနိုင်ဖို့ လိုပါတယ်။ ဒါဟာ နိုင်ငံရေး သမားတွေမှာ တာဝန်ရှိသလို အစိုးရမှာလည်း တာဝန်ရှိပါတယ်။

TREND    ။         ။ ကျွန်တော်တို့နိုင်ငံရဲ့ နိုင်ငံရေး ရေခံမြေခံအရ၊ ဖြတ်သန်းလာတဲ့ အခင်းအကျင်းတွေအရ လိုအပ်နေတာက အရပ်ဘက်-စစ်ဘက် ဆက်ဆံရေး မျှမျှတတသွားမယ့် အစိုးရတစ်ရပ် ပေါ်ထွန်းလာဖို့လို တယ်လို့မြင်တယ်။ ဒီအပေါ်မှာ ဘာများပြောချင်ပါသလဲ။
UKH     ။        ။ ကျွန်တော့်ရဲ့အမြင့်ဆုံးရည်မှန်းချက်ကတော့ ရွေးကောက်ပွဲကနေပြီးတော့ ညွန့်ပေါင်း အစိုးရတစ်ရပ်ကို မျှော်လင့်တယ်။ တိုင်းရင်းသားပါတီ တိုင်းရင်းသားခေါင်းဆောင်တွေကိုလည်း ကိုယ်စားပြုမှုအနေနဲ့ ပါဝင်စေချင်တယ်။ အခြားပါတီတွေက ပုဂ္ဂိုလ်တွေကိုလည်း ပါဝင်စေချင်တယ်။ ဒီလိုပဲတပ်မတော်နဲ့ ရင်းနှီးပြီးတော့ တပ်မတော်နဲ့ တစ်သားတည်းရှိတဲ့ ပါတီက ပုဂ္ဂိုလ်တွေကိုလည်း ပါဝင်စေချင်တယ်။ ညွန့်ပေါင်း အစိုးရဆိုတာမျိုး ဖြစ်စေချင်တယ်။ ဒါဆိုရင် အရပ်ဘက်-စစ်ဘက်ဆက်ဆံရေး မကျေလည်မှုတွေ ကြားကာလမှာ မရှိနိုင်ဘူး။ အဲဒီလိုမရှိမှသာလျှင် နိုင်ငံတော်ရဲ့ ပြုပြင် ပြောင်းလဲရေးကို လုပ်ယူလို့ရမယ်။ မကျေလည်မှုတွေရှိ နေရင် နိုင်ငံတော်အပြောင်းအလဲမှာ အဟန့်အတား ဖြစ်စေနိုင်တယ်။ ဒီတော့ နိုင်ငံတော်အပြောင်းအလဲကို ပြုလုပ်ချင်တယ်ဆိုရင် အရပ်ဘက်-စစ်ဘက်ဆက်ဆံရေး  အားကောင်းမောင်းသန် ဖြစ်လာဖို့လိုတယ်။ နိုင်ငံရေး အပြောင်းအလဲအပြီး အရပ်သားအစိုးရ ပေါ်ပေါက်လာရင်၊ လွှတ်တော်ပေါ်ပေါက်လာရင် နှစ်ဖက်ဖြေလျှော့မှုတွေ ရှိလာဖို့လိုပါ တယ်။ နိုင်ငံရေးအရ သဘောထား တင်းမာနေခြင်းဟာ တိုင်းပြည်အတွက် အဖြေမဟုတ်ဘူး။ နှစ်ဦးနှစ်ဖက် မယုတ်မလွန်သွားတာဟာ အမျိုးသားညီညွတ်ရေးအတွက် ရှေးရှုတာပါပဲ။ အရပ်ဘက်-စစ်ဘက် ဆက်ဆံရေး ကောင်းမွန်လာမှ နိုင်ငံတော်တည်ဆောက်လို့ရမှာပါ။ နိုင်ငံတစ်နိုင်ငံမှာက တစ်ဖွဲ့တည်း၊ တစ်စုတည်း အင်အားကောင်းနေလို့ မရဘူး။ အပြန်အလှန် ထိန်းကျောင်းမှုဖြစ်စဉ်တွေ အားကောင်းဖို့လို တယ်။ အပြန်အလှန်ထိန်းကျောင်းမှု အားကောင်းတယ်ဆိုတာက တစ်ယောက်ကလုပ်တာကို တစ်ယောက်က အပြစ်ထိုင်ပြောနေတာမဟုတ်ဘဲနဲ့ တိုင်းပြုပြည်ပြုကိစ္စ၊ အမျိုးသားအကျိုးစီးပွားနဲ့ ယှဉ်လာ တဲ့ကိစ္စ၊ နိုင်ငံတော်တည်ဆောက် ရေးကိစ္စတွေမှာ အပြန်အလှန် ထိန်းကျောင်းတာမျိုး ဖြစ်ဖို့လိုပါတယ်။
    အရပ်ဘက်-စစ်ဘက်ဆက်ဆံရေးကောင်းဖို့လိုတယ်။ ပြောရရင် အစိုးရ၊ လွှတ်တော်၊ တပ်မတော်နဲ့ ပြည်သူအားလုံးညီညွတ်နေမှ အပြန် အလှန်ယုံကြည်မှုတွေ ရလာနိုင်မှာ ဖြစ်ပါတယ်။

TREND    ။         ။ တစ်သီးပုဂ္ဂလ လွှတ်တော်ကိုယ်စား လှယ်လောင်းတစ်ယောက်အနေနဲ့ မဲဆန္ဒရှင် ပြည်သူတွေကို ဘာများပြောချင်ပါသလဲ။
UKH     ။        ။ မဲဆန္ဒရှင်ပြည်သူတွေကိုဘာပြော ချင်လည်းဆိုတော့ လူဆိုတာကတော့ အမြင့်ဆုံးကိုမျှော် မှန်းကြတာပါပဲ။ ခုချိန်မှာ ဖြစ်သင့်တာကို ဦးစားပေး ဆောင်ရွက်ရမယ့်အချိန်ပါ။ ပြည်သူတွေအနေနဲ့ ပါတီကို လည်းကြည့်ပါ။ လူပုဂ္ဂိုလ်တွေကိုလည်းကြည့်ပါ။ အရည်အချင်းနဲ့ နိုင်ငံ ရေးဖြတ်သန်း မှုတွေကို ကြည့်ဖို့လိုပါတယ်။ တစ်သီးပုဂ္ဂလပဲဖြစ်ဖြစ်၊ ပါတီကပဲဖြစ်ဖြစ် ကြည့်ပြီးရင် ကိုယ့်ဒေသ၊ ကိုယ့်မြို့နယ်အတွက် အားကိုးစရာ ရှာရမယ်။ လွှတ်တော်ကိုယ်စားလှယ်ဆိုတာက အစိုးရနဲ့ ပြည်သူကြား ကြားခံကိုယ်စားလှယ် ဖြစ်တယ်။ ကိုယ်စားလှယ် လောင်းတွေကို အရည်အချင်းလိုက် ကြည့်ပြီးရင် မဲပေးရမယ်။ ရွေးကောက်ပွဲမှာ ပါဝင်ရမယ်။ ဒါမှလည်း နိုင်ငံတော်ရဲ့ အရွေ့တစ်ခုကို ပြန်ပြီးတော့ အစပြုနိုင် လိမ့်မယ်။ပြည်သူလူထုအနေနဲ့ မဲပေးဖို့ လိုပါတယ်။

TREND    ။         ။ ဦးကျော်ထက်ရဲ့ ရွေးကောက်ပွဲကတိ ကဝတ်က ဘာများဖြစ်မလဲ။
UKH    ။        ။ ကျွန်တော်ရဲ့ ရွေးကောက်ပွဲကတိ ကဝတ်ကတော့ ကျွန်တော်က Right to Recall ကို ကြိုက်တယ်။ ကိုယ်စားလှယ်လောင်းတစ်ယောက်က ကိုယ့်မြို့ နယ်အတွက် ကတိတွေပေးပြီး ရာခိုင်နှုန်း ၅၀ တောင် ပြည့်အောင် အကောင်အထည် မဖော်ပေးနိုင်တဲ့ ကိုယ်စားလှယ်လောင်းတွေ အရင်အစိုးရ လက်ထက်မှာ တွေ့ခဲ့ရတယ်။ ရွေးကောက်ပွဲရှိရင်သာ ကိုယ်စားလှယ်လောင်းတွေ အများကြီးပေါ်လာတာ နိုင်ငံရေးသမား ဟုတ်တဲ့သူရော၊ မဟုတ်တဲ့သူရော ပေါ်လာတာပြီးရင် ကတိတွေပေးကြမယ်။ လွယ်လွယ်ပြောကြမယ်။ လွယ်လွယ်ပြောပြီး ဘာမှမလုပ်နိုင်တာတွေဖြစ်ပြီး လွှတ်တော်ထဲမှာသွားငုတ်တုတ် ထိုင်ပြီး အိပ်ငိုက်နေတာတွေရှိတယ်။ ဒီလိုမျိုးတွေ မဖြစ်ရအောင် ကျွန်တော်ကတော့ ကိုယ့်မြို့နယ်မှာရှိတဲ့ ပြည်သူတွေအပေါ် နိုင်ငံရေးအရ တာဝန်ကျေသူဖြစ်ရမယ်လို့ ကတိပြုတယ်။ ကျွန်တော့်ကို မကြိုက်ရင် ကျွန်တော်ကိုယ် တိုင် နုတ်ထွက်ပေးမယ်။ Right to Recall ဥပဒေကိုလည်း နည်းဥပဒေ ပေါ်ပေါက်လာတဲ့ အထိလွှတ်တော်ထဲမှာ တောင်းဆိုပေးမယ်။ ပြည်သူ လူထုအတွက် လိုအပ်တဲ့ဥပဒေတွေ ပေါ်ပေါက်လာဖို့ တောင်းဆိုပေး မယ်။ မလိုအပ်ဘဲ ပြည်သူလူထု ဝန်ထုပ်ဝန်ပိုး ဖြစ်စေမယ့် ဥပဒေတွေကို ဖျက်သိမ်းဖို့ တိုက်တွန်းသွားမယ်ပေါ့လေ။ ဒေသခံတွေရဲ့ မြေပြင်အခက်အခဲတွေကိုလည်း သက်ဆိုင်ရာဌာနတွေနဲ့ အတူ ဝိုင်းဝန်းဖြည့်ဆည်းကူညီပေးမယ်ဆိုတာ ကျွန်တော်ပေးနိုင်တဲ့ ကတိပါပဲ။ ထူးမြတ်

(TREND News ဂျာနယ်အတွဲ(၄)၊ အမှတ်( ၄၅ ) တွင်ပါရှိသော အင်တာဗျူးအား တဆင့်ပြန်လည်မျှဝေခြင်းဖြစ်ပါသည်။ )

TREND News Journal PDF File Download Link