၂၀၂၃ ဇွန် ၁၅
ရခိုင်ပြည်နယ်ရှိ မြို့နယ် အချို့ ယခုဇွန်လကုန်မှ ဇူလိုင်လ ပထမအတွင်းမှသာ လျှပ်စစ်မီး ပြန်ရမယ်လို့ စစ်ကောင်စီရဲ့ ရခိုင်ပြည်နယ် ပြောရေးဆိုခွင့်ရှိသူ ဦးလှသိန်းက ပြောပါတယ်။
ယင်းက “မိုခါကြောင့် ရခိုင်ပြည်နယ် (၁၇)မြို့နယ်လုံးပျက်စီးမှုမှာ ကျပ်ငွေဘီလီယံ ငါးရာနှစ်ဆယ်ကျော်ရှိပါတယ်။ သေဆုံးသူ (၁၄၈) ဦးရှိခဲ့ပါတယ်။ စစ်တွေ ၊ ပုဏ္ဏားကျွန်း မီးလင်းပါပြီ။ ကျန်မီးမလင်းသေးတဲ့ မြို့နယ်များ ဇွန်လကုန်မှာ မီးလင်းပါမယ်။ ဘူးသီးတောင်၊ မောင်တော ဇူလိုင် ပထမပတ် လျှပ်စစ်မီးပြန်ရပါမယ်။ တယ်လီဖုန်းဆက်သွယ်မှု အပြည့်အဝပြန်ရခဲ့ကြပါပြီ” လို့ ယနေ့ ဇွန်လ ၁၅ ရက်နေ့ မိုခါ မုန်တိုင်းတိုက်ခတ်မှု ၁ လပြည့်နေ့မှာ ပြောတာပါ။
အဆိုပါ မိုခါ မုန်တိုင်းကြောင့် ရခိုင်ပြည်နယ်မှာ အခြေခံပညာကျောင်းပေါင်း (၁၅၃၈)ပျက်ခဲ့ပြီး လက်ရှိမှာတော့ ထက်/လယ်/မူ (၄၁၆) ကျောင်းပြန်ပြင်ပြီး ပြုပြင်ဆဲ (၉၄၉)ကျောင်းနှင့် ပြုပြင်ရန် ကျန် (၁၇၃)ကျောင်း ရှိကာ ကျောင်းပေါင်း (၁၁၈)ကျောင်းကတော့ အသစ်ပြန်ဆောက်ရပါမယ်လို့ ယင်းက ပြောပါတယ်။
အလားတူ ဆေးရုံ၊ ဆေးခန်း၊ ဆေးပေးခန်း (၇၅၂)ခုပျက်စီးခဲ့ပြီး (၇၅၀)ဖွင့်လှစ်ထားပြီလို့လည်း ဆိုပါတယ်။
