2023 နိုဝင်ဘာ ၁၂
လက်ရှိ လက်နက်ကိုင်တိုက်ပွဲများနှင့်ပတ်သက်ပြီး အမြင်အမျိုးမျိုးနှင့် ဝေဖန်လေကန်နေကြတာ အွန်လိုင်းပေါ်မှာ မမြင်ချင်အဆုံးပါ။ အထူးသဖြင့် မစားရဝခမန်းတင်နေသူများက တပ်မတော်မုန်းတီးရေးသမားများ၊ လက်ရှိ NUG ၏ဆောင်ရွက်ချက်များကိုသံယောင်လိုက်နေသူများ နှင့် တိုင်းရင်းသားလက်နက်ကိုင်အဖွဲ့အစည်းအသီးသီးက ဝါဒဖြန့်တာဝန်ခံများပဲဖြစ်ကြပါသည်။ လက်ရှိလက်နက်ကိုင်တိုက်ပွဲများဆင်နွှဲနေကြသည့် NUG ၊ PDF နှင့် အဖွဲ့အသီးသီးတို့၏ဆောင်ရွက်ချက်ကိုကြည့်လျှင် တစ်ဖက်က မြေပြင်တိုက်ပွဲများဆင်နွှဲနေပြီး တစ်ဖက်က အွန်လိုင်းပေါ်မှ လေတိုက်ပွဲများဆင်နွှဲနေသည်ကိုတွေ့ရမှာဖြစ်ပါသည်။ တချိူ့ကိစ္စရပ်များတွင် တစ်စိတ်ကို တစ်အိတ်မက ချဲ့ကားပြောဆိုနေကြသည်ကိုလည်းတွေ့ရပါသည်။
ယခုရက်ပိုင်းအတွင်းရှမ်းပြည်နယ် မြောက်ပိုင်းဒေသမှာဖြစ်ပွားနေသည့်အခြေအနေ၏အစဟာ MNDAA ၊ TNLA နှင့် AA တို့ပူးပေါင်းထားသည့် မြောက်ပိုင်းမဟာမိတ်အဖွဲ့က စတင်ခဲ့ခြင်းပဲဖြစ်ပါသည်။ သူတို့ပူးပေါင်းဆောင်ရွက်သည့် စစ်ဆင်ရေးကို ၁၀၂၇ စစ်ဆင်ရေးလို့လည်းအမည်ပေးထားပါသည်။ ယခင်ဗကပလမ်းစဥ်အတိုင်း အောက်တိုဘာလ ၂၇ ရက်နေ့မှာစတင်ခဲ့တာကို အမည်သတ်မှတ်ပေးထားခြင်းပဲဖြစ်ပါသည်။ စတင်ချိန်က တရုတ်နိုင်ငံအစိုးရ အလိုရှိနေသည့် ကျားဖြန့် ခေါ် လောင်ကစားနှင့် အွန်လိုင်း ငွေလိမ်လည်မှုလုပ်ငန်းများဆောင်ရွက်နေသည့် တရုတ်နိုင်ငံသားများနှင့် မြန်မာနိုင်ငံသားများကို မြန်မာနိုင်ငံအစိုးရက ထိထိရောက်ရောက်ဖမ်းဆီးပေးခြင်းမရှိသည့်အတွက် ဟူ၍အကြောင်းပြခဲ့ကြတာတွေ့ရမှာဖြစ်ပါသည်။
ရက်ပိုင်းအတွင်းမှာပဲ ကချင်ပြည်နယ်၊ကရင်ပြည်နယ်၊ ချင်းပြည်နယ်နှင့်စစ်ကိုင်းတိုင်းအတွင်းမှာ KIA ၊ KNU ၊CNF ၊ ABSDF နှင့် PDF တို့က တိုက်ပွဲများ လုပ်လာခဲ့ကြပါသည်။ အထူးသဖြင့် တပ်မတော်နှင့် ရဲတပ်ဖွဲ့အင်အားနည်းသည့် စခန်းငယ်လေးတွေကိုတိုက်ခိုက်ခြင်း၊ တချို့မြို့တွေမှာ ခံစစ်ယူထားသည့်တပ်စခန်းများကိုထိန်းချုပ်ထားပြီးမြို့တွင်းသို့ဝင်ရောက်မီးရှို့ဖျက်ဆီးခြင်းများပြုလုပ်ခဲ့ကြတာပဲဖြစ်ပါသည်။ ထိုသို့ဆောင်ရွက်ခြင်းကို အောင်ပွဲအဖြစ် တပ်မတော်ကျရှုံးနေသယောင် အွန်လိုင်းပေါ်မှာဝါဒ ဖြန့် နေကြသည်ကိုလည်းတွေ့ရမှာဖြစ်ပါသည်။
ထိုသို့ KIA၊ KNU၊ ABSDF၊ CNF နှင့် PDF အဖွဲ့များက တိုက်ခိုက်မှုများပြုပြီးနောက်မှာ မြောက်ပိုင်းမဟာမိတ်အဖွဲ့၏ လေသံပြောင်းသွားတာကိုသတိထားမိမှာဖြစ်ပါသည်။ NUG နှင့် ပူးပေါင်းပြီး နွေးဦးတော်လှန်ရေးအောင်မြင်သည်အထိ တိုက်ပွဲဝင်သွားမည်ဟုဆိုထားသည်ကိုတွေ့ရပါသည်။ တရုတ်နိုင်ငံမှ တာဝန်ရှိအဆင့်မြင့် ကိုယ်စားလှယ်အဖွဲ့လာရောက်ပြီး နယ်စပ်ဒေသလုံခြုံရေး၊ တရားဥပဒေစိုးမိုးရေးလုပ်ငန်းများအတူတကွပေါင်းစည်းဆောင်ရွက်ရန်ဆွေးနွေးသဘောတူပြီးနောက်မှာ မြောက်ပိုင်းမဟာမိတ်အဖွဲ့ဟာ NUG ကာဗာ ရယူသွားသည့်သဘောလို့ယူဆရပါသည်။
မြောက်ပိုင်းမဟာမိတ်အဖွဲ့မှာပါသည့် အဖွဲ့အသီးသီး၏ ဇစ်မြစ်ကိုပြန့်ကြည့်လျှင် MNDAA သည် ဝ နှင့် မိုင်းလား အဖွဲ့များနှင့် ပိုမိုနီးစပ်ပြီး KIA နှင့် လည်း မဟာမိတ်ဟူ၍ဆိုနိုင်ပါသည်။ TNLA နှင့် AA အဖွဲ့များကတော့ လုံးလုံး လျားလျား KIA ၏ လက်အောက်ခံတပည့် အဖွဲ့အစည်းများဟူ၍ဆိုရပေလိမ့်မည်။ သူတို့ကို စတင်ဖွဲ့စည်းပေးပြီးကြီးထွားလာသည်အထိ ဖန်တီးပေးခဲ့တာ KIA ပဲဖြစ်ပါသည်။ သတိထားမိသည်မှာ လက်နက်ကိုင်တိုင်းရင်းသားအဖွဲ့များတွင် သဘာဝတစ်ခုရှိပါသည်။ အကြောင်းအမျိုးမျိုးကြောင့်ကိုယ်တိုင်လက်နက်ကိုင်လမ်းစဥ်နောက်ကိုလိုက်ခဲ့သည်ကို ကျန်တိုင်းရင်းသားများလက်နက်ကိုင်လမ်းစဥ်နောက်လိုက်စေရန် သွေးခွဲ၊မြှောက်ပင့်ပေးရုံမက စစ်ပညာနှင့် လက်နက်များပင်တတ်ဆင်ပေးခဲ့ကြခြင်းပဲဖြစ်ပါသည်။
၁၉၄၉ ခုနှစ်တွင် ကရင်လူမျိုးများ လက်နက်ကိုင်လမ်းစဥ်နောက်လိုက်ချိန်မှာ ကချင်လက်နက်ကိုင်အဖွဲ့မရှိသေးပါ။ ၁၉၄၇ခုနှစ်ပင်လုံညီလာခံမှာ ကချင်လူမျိုးခေါင်းဆောင် ဒူဝါများက ပြည်နယ်တောင်းဆိုပြီး ပြည်နယ်ရရှိခဲ့သည့်အတွက် ပြည်ထောင်စုအတွင်းကခွဲမထွက်ပါဟူ၍ ကတိကဝတ်ပြုခဲ့ကြပေသည်။ ထိုအချိန်မှာ စောဘဦးကြီးက သူတို့တော်လှန်တော့မည်ဖြစ်သည့်အတွက် သူတို့နှင့်ပူးပေါင်းရန် ဆမားဒူဝါ ဆင်ဝါးနောင်ကို စည်းရုံးခဲ့ပါသည်။ ဆမားဒူဝါကြီးက ဝန်ကြီးချုပ်ဦးနုကိုသတင်းပို့ခဲ့သည့်အတွက် ဦးနုက စောဘဦးကြီးနှင့် ကရင်ခေါင်းဆောင်များကို ခေါ်ယူဖြောင်းဖျစည်းရုံးခဲ့ပါသေးသည်။ သို့သော်အချည်းအနှီးသာဖြစ်ခဲ့ရပါသည်။
တပ်မတော်အတွင်းရှိ ကရင်သေနတ်ကိုင်တပ်ရင်းတွေတောခိုစဥ်မှာ ကချင်သေနတ်ကိုင်တပ်ရင်းများတောမခိုခဲ့ပါ။ သို့သော် ကချင်သေနတ်ကိုင်တပ်ရင်းမှ ဗိုလ်ကြီးနော်ဆိုင်းဦးစီး အင်အားအချို့ KNDO နှင့်ပူးပေါင်းခဲ့ကြပါသည်။ထိုအချိန်အထိလည်း KIA မပေါ်သေးပါ။ KNDO အနေဖြင့်နယ်မြေစိုးမိုးသိမ်းပိုက်ထားနိုင်ရေး မြန်မာနိုင်ငံနေရာအနှံ့မှာအင်အားဖြန့်ခွဲထားရှိခဲ့ပါသည်။ နော်ဆိုင်းနှင့် အဖွဲ့ကို ရှမ်းပြည်မြောက်ပိုင်းသို့စေလွှတ်ခဲ့ရာ ကချင် လူငယ် ဇော်မိုင်သည် နော်ဆိုင်းအဖွဲ့တွင်ပူးပေါင်းပါဝင်ခဲ့ရာမှ KIA လမ်းစပေါ်ပေါက်ခဲ့ခြင်းဖြစ်ပါသည်။ နောက်ပိုင်းမှာ နော်ဆိုင်းက ဗကပနှင့် ပူးပေါင်းခဲ့ပြီး ဇော်မိုင်က KNU မှာကျန်နေခဲ့ပါသည်။ KNU က ဇော်မိုင်ကို ဦးဆောင်စေပြီး KIA အဖြစ်ဖွဲ့စည်း ကူညီပေးခဲ့ခြင်းဖြစ်ပါသည်။ တိုင်းရင်းသားလက်နင်ကိုင်အင်အားစုများကြီးထွားလာစေပြီးဗဟိုအစိုးရအကြပ်တည်းဖြစ်၊ သူတို့လိုချင်တာရဆိုသည့်သဘောထားပဲဖြစ်ပါသည်။ ထွန်းမြတ်နိုင်၏ AA သည်လည်း မူလအစက KNU က ဖွဲ့စည်းသင်ကြားပေးခဲ့တာပါ။ ရခိုင်ပြည်နယ်မှာပြန်လည်အခြေချခဲ့ကြပေမဲ့ အဆင်မပြေသည့်အတွက် KIA ဆီရောက်သွားခဲ့ခြင်းပဲဖြစ်ပါသည်။ KIA က ဖားကန့်နှင့် နယ်မြေအသီးသီးမှာရှိသည့် ရခိုင်လူငယ်များကို လူသစ်အဖြစ် စုဆောင်း၊ စစ်ပညာသင်၊ လက်နက်တတ်ဆင်ပေးခဲ့သည့်အတွက် AA သည် နေ့ချင်းညချင်း ကြီးထွားလာခဲ့ခြင်းဖြစ်ပါသည်။ အလားတူ TNLA ကိုလည်း KIAက ပံ့ပိုးပေးခဲ့ပြီး ယခုအခါမှာ လက်နက်ခဲယမ်းအပြင် နယ်မြေပင်ခွဲပေးခဲ့သည့်အတွက် TNLA တို့အနေဖြင့် KIAအလိုကျ ဆောင်ရွက်မည့်သဘောသာဖြစ်ပါသည်။ ထို့အပြင် ၂၀၂၁ ခုနှစ် နိုင်ငံရေးအခြေအနေအရ လက်နက်ကိုင်လမ်းစဥ်နောက်လိုက်မည့် လူငယ်လေးတွေကို စစ်ပညာသင် လက်နက်တတ်ဆင်ပေးခဲ့တာလည်း ဒီ KNU နှင့် KIAပဲ မဟုတ်ပါလား။
ယခုအချိန်မှာ ရှမ်းပြည်မြောက်ပိုင်းတွင်ဖြစ်ပွားနေသည့် မြောက်ပိုင်းမဟာမိတ်အဖွဲ့၏ စစ်ရေးဆောင်ရွက်ချက်များဟာ KIA၏ ပယောဂမကင်းဘူးဟုဆိုနိုင်ပါသည်။ ထိုမြောက်ပိုင်းမဟာမိတ်အဖွဲ့ သုံးဖွဲ့အင်အားဟာ လက်ရှိဖြစ်ပွားနေသည့် အင်အားလောက်မရှိပါ။ ဤမျှအင်အားရှိလာသည်မှာ နောက်ကွယ်က 'ဝ' ၏အကူအညီပါသည်ဟု တချို့က သုံးသပ်ပြောဆိုနေကြပေမဲ့ မဖြစ်နိုင်ဟုဆိုရပါမည်။ လွန်ရောကျွံရောအကူအညီပေးလျှင် လက်နက်ခဲယမ်းလောက်သာဖြစ်ပါလိမ့်မည်။ သူ့ဒေသနှင့်မဆိုင်သလို သူနှင့်လည်း မည်သည့်ပြဿနာမှမရှိသည့်အတွက် သူ့လူမျိုးများ၏ အသက်ကို အသားလွတ်စတေးမည်မထင်ပါ။ အမှန်တကယ်က KIAစုစည်းပေးထားသည့် PDF များနှင့် KIA က လက်နက်တတ်ဆင်ပေးထားခြင်းသာဖြစ်ပါလိမ့်မည်။ KIA အနေဖြင့် ထိုက်သင့်သည့်တန်ဖိုးရှိသည့်လက်နက်များကို အလကားတော့တတ်ဆင်ပေးမည်မဟုတ်ပါ။ မည်သည့်နေရာက ရနိုင်ပါသနည်း။ အဖြေကရှင်းပါသည်။ ယခုချိန်မှာ ကြွေးကြော်နေသည့် NUG နှင့် အနောက်အုပ်စုက လွဲလို့ တခြားမရှိဘူးဟုဆိုရပေလိမ့်မည်။အလှုကောက်ခံသည်ွငွေကြေးနှင့် ထောက်ပံ့ကြေးရသည့်ငွေကြေးများကဖြစ်ပါလိမ့်မည်။ KIA ကတော့ လိုလားချက်လည်းပြည့် လက်နက်ရောင်းရငွေလည်းရနှင့်သာသာယာယာဟုဆိုရပေလိမ့်မည်။
မှန်သည်မှားသည် မည်သို့ပင်ဆိုစေ။ ငြင်းမရနိုင်သည့်အခြေအနေက KIA၊ KNU ၊ ABSDF၊ CNF နှင့် မြောက်ပိုင်းမဟာမိတ်ဖြစ်သည့် MNDAA၊ TNLA နှင့် AA တို့သည့် နိုင်ငံတော်နှင့်တပ်မတော်က တန်ဖိုးထား စောင့်ထိန်းလျှက်ရှိသည့် NCA လမ်းကြောင်းမှ သွေဖီပြီး အကြမ်းဖက်အဖွဲ့အဖြစ်သတ်မှတ်ထားသည့် NUG၊ PDF တို့နှင့် ပုလင်းတူဗူးစို့ ပူးပေါင်းနေခြင်းပင်ဖြစ်ပါသည်။
ထို့အပြင် ပိုမိုထင်ရှားသည်က ၂၀၂၃ ခုနှစ် အောက်တိုဘာလ ၃၁ ရက်နေ့မှာ NUG တို့ ပြုလုပ်ခဲ့သည့် ၃၄ ကြိမ်မြောက် အစည်းအဝေးမှာ ပြောဆိုခဲ့သည့် လရှီးလ နှင့် မန်းဝင်းခိုင်သန်းတို့၏ပြောဆိုချက်များပင်ဖြစ်ပေသည်။မန်းဝင်းခိုင်သန်း၏ မိန့်ခွန်းတွင် "MNDAA၊ TNLA၊ AA တို့နှင့်အတူ နွေဦးတော်လှန်ရေးက မွေးထုတ်ပေးလိုက်တဲ့ တော်လှန်ရေးအင်အားစုတွေ ပူးပေါင်း စစ်ဆင်တယ်ဆိုတာ ကျွန်တော်တို့ ပြည်သူတွေမျှော်လင့်နေကြတဲ့ Symbolic လို့ပြောရမဲ့ ကြီးမားတဲ့ မဟာမိတ်စုဖွဲ့မှု ကို အပြောသက်သက်မဟုတ်၊ အလုပ်နဲ့ သက်သေပြတာပဲဖြစ်ပါတယ်။"ဟူ၍ ဆိုထားပါသည်။နိုင်ငံတကာကိုရှင်းလင်းပြောဆိုရမည်ဆိုလျှင် ဤအချက်သည်အဓိက ကျပါလိမ့်မည်။
ထို့အပြင်လက်ရှိဖြစ်ပွားနေသည့် တိုက်ပွဲများကို အောင်မြင်မှုအဖြစ်သတ်မှတ်ပြီးဂုဏ်ယူမြှောက်ပင့်ပေးခဲ့ကြတာကိုလည်းတွေ့ရပါသည်။ ထိုသို့တိုက်ပွဲများဖြစ်ပွားနေသည့်အတွက် ရှမ်းပြည်မြောက်ပိုင်းမှာ ပြည်သူများစစ်ဘေးရှောင်နေရသည်ကိုလည်း ၄င်းတို့၏တာဝန်မဟုတ်ဘဲ တပ်မတော်က လက်နက်ကြီးပစ်လို့၊ လေကြောင်းတိုက်ခိုက်လို့ဆိုပြီး NUG က ကြေညာချက်ထုတ်ပြန်ထားပါသေးသည်။ ကိုယ့်လုပ်ရပ်ကိုဖုံးကွယ်ပြီးတာဝန်မယူရဲသူများဟုဆိုရပေလိမ့်မည်။ တည်ငြိမ်အေးချမ်းနေသည့် ဒေသမှာ စစ်ကိုမည်သူကစတင်ခေါ်ယူခဲ့ပါသနည်းဟုဆိုလျှင် ထို အကြမ်းဖက်သောင်းကျန်းသူများမည်သို့ဖြေမည်မသိ။ N CA ကိုတန်ဖိုးထားပြီး တစ်နှစ်တာ တစ်ဖက်သတ် အပစ်အခတ်ရပ်စဲပေးထားသည့် တပ်မတော်၏ စေတနာကို ခုတုံးလုပ်တိုက်ခိုက်ခဲ့ခြင်းသက်သက်ဟုဆိုရပေလိမ့်မည်။ တပ်စခန်းငယ်လေးတွေကိုတိုက်ခိုက်၊ မြို့တွေကိုမီးရှို့ဖျက်ဆီး၊တံတားတွေဖောက်ခွဲဖျက်ဆီး၊ ရွာတွေကို တန်ဆာခံအဖြစ်ထိန်းသိမ်း အခြေပြု စသည့်လုပ်ရပ်များဟာ မည်သို့မျှခွင့်လွှတ်နိုင်စရာမရှိသည့်လုပ်ရပ်များပင်ဖြစ်ပါသည်။ ထိုလုပ်ရပ်များကို ဖုံးကွယ်ပြီးတပ်မတော်အပေါ် ပုံချနေသည့် NUG ၏ လုပ်ရပ်ကိုဒေသခံပြည်သူတွေ သိနေကြပြီဖြစ်ပါသည်။ မူဆယ်၊ ကွတ်ခိုင်၊လားရှိုး၊ သိန်းနီ၊ ကျောက်မဲ၊ နောင်ချိုဒေသမှာရှိသည့် ရှမ်းတိုင်းရင်းသားများနှင့် သာမန်ပြည်သူလူထု၏ သဘောထားများကို NUG ၊ KIA၊ MNDAA၊ TNLA နှင့် AA တို့မသိမရှိပါ။ လေထဲက ဝါဒဖြန့် ကြေညာချက်ထုတ်ရုံနှင့် ဤအပြစ်များပျောက်သွားမည်မဟုတ်ပါ။
လက်ရှိဖြစ်ပွားနေသည့် အခြေအနေများအရ ပြည်တွင်းတည်ငြိမ်အေးချမ်းရေးအတွက် အစိုးရနှင့် တပ်မတော်အနေဖြင့် NCA လမ်းကြောင်းတစ်ခုတည်းကို ဆုတ်ကိုင်ထား၍မသင့်ဟုမြင်ပါသည်။ NCA ကိုတန်ဖိုးထားသည့် လက်နက်ကိုင်တိုင်းရင်းသားအဖွဲ့များကို NCA နည်းလမ်းအတိုင်း တန်ဖိုးထားနွေးထွေးပျူငှာစွာ ဆက်ဆံရမှာဖြစ်သလို NCA ကိုတန်ဖိုးမထားဘဲ ထော်လော်ကန့်လန့်တိုက်၊ အကြမ်းဖက်လုပ်ရပ် နှင့် NCA ကိုသွေဖီစေမည့် လုပ်ရပ်များကိုလုပ်ဆောင်နေကြသည့်လက်နက်ကိုင်အဖွဲ့များကိုတော့ အသိတရားပြန်ဝင်လာစေရေး ပြတ်ပြတ်သားသား ဆုံးမ မှ သာသင့်တော်မည်ထင်ပါသည် ။သို့မဟုတ်ပါက ပြည်သူများပင်ပန်းဆင်းရဲနေကြလိမ့်မည်ဖြစ်ပါသည်။
ဇော်နိုင်
( TREND News ဂျာနယ်၊အတွဲ ၂၊ အမှတ် ၄၂ တွင် ပါရှိသော ဆောင်းပါးအား တဆင့်ပြန်လည်မျှဝေခြင်းဖြစ်ပါသည်။ )
