ရန်ကုန်၊ နိုဝင်ဘာ ၂၄
    ရှမ်းပြည်နယ်(တောင်ပိုင်း)နှင့် အရှေ့ပိုင်းကို ချိတ်ဆက်ထားသည့် သံလွင်တံတား(တာကော်) တံတားသစ်မှ ကုန်တင်ယာဉ်အစီးရေ ၁၀၀ ကျော် နေ့စဉ် ဖြတ်သန်း အသုံးပြုလျက်ရှိကြောင်း တာကော် ပူးပေါင်း စစ်ဆေးရေးဂိတ်မှ တာဝန်ရှိသူတစ်ဦးက ပြောသည်။
    "နေ့စဉ် ခရီးသွားကားကြီးတွေရော၊ ကုန်စည်ကားတွေရောဆိုရင် နေ့စဉ် အသွားအပြန် ၂၅၀ လောက်ရှိပါတယ်။ ကုန်ကားတွေက အစီးရေ ၁၀၀ ကျော် ဖြတ်သန်းသွားလာပြီးတော့ ခရီးသည်တင်ကားတွေကတော့ ၁၅၀ လောက် နေ့စဉ် ပျမ်းမျှရှိပါတယ်"ဟု ယင်းတာဝန်ရှိသူက ပြော သည်။
    အဆိုပါ ကုန်တင်ယာဉ်ကြီးများ၊ ခရီးသည်တင်ကားများမှာ တာချီလိတ်၊ ကျိုင်းတုံမှ လာရောက်သည့် ကားများနှင့် မန္တလေး၊ တောင်ကြီးတို့ဘက်မှ လာရောက်သော ကားများဖြစ်ပြီး တံတားအား ဖြတ်သန်း၍ လွယ်ကူချောမွေ့စွာ သွားလာနေကြခြင်း ဖြစ်ကြောင်း ပူးပေါင်းစစ်ဆေးရေးဂိတ်မှ တာဝန်ရှိ သူက ဆက်ပြောသည်။
    သံလွင်တံတား(တာကော်) တံတားအသစ်သည် တောင်ကြီး-ကျိုင်းတုံလမ်းပိုင်း လွိုင်လင်ခရိုင် ကွန်ဟိန်းမြို့နယ်တွင် တည်ရှိသည်။ တံတားအမျိုးအစားမှာ အပေါ်ထည် ပင်မတံတား Steel Box Girder နှင့် RCC Slab ဖြစ်ပြီး ချဉ်းကပ်တံတား PC Girder , RC Girder နှင့် RCC Slab အမျိုး အစားတို့ဖြင့် ပေါင်းစပ် တည်ဆောက်ထား ခြင်းဖြစ်သည်။ တံတားအရှည် ၁၁၅၁ ပေ၊ ယာဉ်သွားလမ်း နှစ်လမ်းသွားနှင့် တံတားအောက်ရေလမ်းကင်းလွတ်  အမြင့် ၃၅ ပေ ၉ လက်မနှင့် ရေလမ်းကင်းလွတ်အကျယ်ပေ ၃၆၀ ရှိပြီး တံတား၏ခံနိုင်ဝန်မှာ  ယာဉ်တစ်စီးချင်း တန် ၆၀ ဖြစ်ကြောင်း သိရသည်။
    သံလွင်တံတား(တာကော်)တံတား အဟောင်းသည် သက်တမ်း ၄၄ နှစ်ကျော် ကြာမြင့်ခဲ့ပြီ ဖြစ်၍ တံတား ခံနိုင်ဝန်အား လျော့နည်း ကျဆင်းလာသည့်အတွက် တံတားဟောင်း၏ Up Stream ဘက်တံတား၏ ပေ ၇၀ အကွာတွင် တံတားအသစ်တစ်စင်း ကို တံတားဦးစီးဌာန တံတားအထူးအဖွဲ့(၁၂) မှ ၂၀၁၈ ခုနှစ် ဧပြီလတွင် စတင်၍ တာဝန်ယူတည်ဆောက်ခဲ့ခြင်းဖြစ်ပြီး နိုင်ငံတော် စီမံအုပ်ချုပ်ရေး ကောင်စီလက် ထက် ၂၀၂၄ ခုနှစ် ဧပြီလအတွင်း အောင်မြင်စွာ ဖွင့်လှစ် ပေးနိုင်ခဲ့ခြင်း ဖြစ်သည်။ နဒီ