ရန်ကုန်၊ နိုဝင်ဘာ ၂၇
    နေပြည်တော်တွင် ကျင်းပမည့် ၂၀၂၄ ခုနှစ်အတွက် မြန်မာ့ရုပ်ရှင်ထူးချွန် ဆုချီးမြှင့်ပွဲ အခမ်းအနားတွင် အကယ်ဒမီဆုဗန်းကိုင်ဆောင်ရန်အတွက် မြန်မာနိုင်ငံရုပ်ရှင်အစည်းအရုံးက အကယ်ဒမီဆု ဗန်းကိုင် လျှောက်လွှာများ စတင်ခေါ်ယူနေပြီ ဖြစ်သည်။
    အကယ်ဒမီဆု ဗန်းကိုင် လျှောက်ထားကြမည့် အမျိုးသား/အမျိုးသမီးများသည် ၂၀၂၄ ခုနှစ် ဒီဇင်ဘာ ၃၁ ရက်တွင် အသက်(၁၆)နှစ် ပြည့်ပြီး အသက်(၂၅)နှစ် မကျော်လွန်သူဖြစ်ရမည့်အပြင် အိမ်ထောင် မရှိသူ (အပျို/လူပျို) ဖြစ်ရမည်ဟူ၍ အရည် အချင်းများ သတ်မှတ်ထားသည်။ 
    ထို့အပြင် အမျိုးသမီးဖြစ်ပါက အရပ်အမြင့် (ဖိနပ်မပါ) ၅ ပေ ၂ လက်မမှ ၅ ပေ ၈ လက်မ အတွင်းဖြစ်သူ၊ အမျိုးသားဖြစ်ပါက အရပ်အမြင့်(ဖိနပ်မပါ) ၅ ပေ ၆ လက်မမှ ၆ ပေအထိ ဖြစ်ရမည်၊ ကျန်းမာရေး ကောင်းမွန်သူ၊ အကျင့်စာရိတ္တကောင်းမွန်သူနှင့် ကိုယ်ခန္ဓာ အချိုးအစား ပြေပြစ်သူများ ဖြစ်ရမည်ဟူ၍ အရည်အချင်းများ သတ်မှတ်ထားပြီး အဆိုပါ အရည်အချင်းနှင့် ကိုက်ညီသောသူများ လျှောက်ထားနိုင်သည်ဟူ၍ အသိပေးထားသည်။
    လျှောက်လွှာများကို ရန်ကုန်တိုင်းဒေသကြီး ဗဟန်းမြို့နယ် ဝင်္ကပါလမ်းရှိ မြန်မာနိုင်ငံ ရုပ်ရှင်အစည်းအရုံးတွင် နိုဝင်ဘာ ၂၆ ရက်မှ စတင် ထုတ်ယူနိုင်ကြောင်းနှင့် ဒီဇင်ဘာ ၆ ရက် ညနေ ၄ နာရီမတိုင်မီ နောက်ဆုံးထား လျှောက်ထားနိုင်ကြောင်း သတင်းထုတ်ပြန်ထားသည်။ 
    ထို့အပြင် အရွေးချယ်ခံရသည့် ရွှေကြိုမောင်မယ်များအတွက် ရှေ့ဆက်မည့်  အနုပညာလုပ်ငန်း အစီအစဉ်များ သီးခြားရှိကြောင်း မြန်မာနိုင်ငံ ရုပ်ရှင်အစည်းအရုံးမှ အသိပေးထားသည်။
    ၂၀၂၄ ခုနှစ်အတွက် မြန်မာ့ရုပ်ရှင်ထူးချွန်ဆုချီးမြှင့်ပွဲ အခမ်းအနားကို လာမည့် ၂၀၂၅ နှစ် ဖေဖော်ဝါရီတွင် ကျင်းပရန် စီမံထားကြောင်း ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင် မောင်အုန်းက ပြောကြားထားသည်။ နဒီ